Потпретседателот на ВМРО-ДПМНЕ, Владо Мисајловски, вели дека одлуката за поскапување на акцизата на горивата е чист грабеж на граѓаните. Тој вели дека секаде во светот бензините поевтинуваат, само кај нас поскапуваат.
*Поврзана вест: Акцизата на нафтата се зголемува за три денари
„Ова е начин како владата на Заев ќе зема од парите на граѓаните за да ја покрива финансиската дупка што ја направи владата. Значи, владата на Заев ќе се задолжува земајќи пари од граѓаните. На светските берзи цената на нафтата падна скоро за трипати од почетокот на годината до денес. Имено, на почетокот на годината нафтата се тргуваше за 60 долари за барел, а сега истата оди и по цена од 20 долари за барел. И додека светските цени вртоглаво паднаа, во Македонија не само што не паѓа цената на горивата, туку истата и се покачува“,
рече Мисајловски.
Тој се повика на објава од „Њујорк тајмс“ во која се вели дека на светската берза нафтата за јуни се тргува и по 22 долари за барел, што значи дека на светско ниво цената на нафтата подолг период ќе остане ниска.
„Ниската цена на нафтата на светските берзи власта на СДСМ ја користи за овозможување на високи профити на поединци на штета на сиромашниот народ. Оштетени се сите домаќинства кои имаат возило или се греат на екстра лесно масло, фирмите кои користат погонски горива и чија дејност е поврзана со транспортот, како и земјоделците кои во наредниот период треба да произведат храна за да ја прехранат нацијата. Владата ќе прибира пари од народот за да има пари за СЈО, за да има за времени вработувања на партиски кадри“,
рече Мисајловски.
ВМРО-ДПМНЕ не се согласува и апелира да не се злоупотребува кризата за, како што рече Мисајловски, лукративни цели на власта.
„Со ваквата одлука се ризикува ценовен шок и растење на цените на други производи поврзани со цената на чинење на нафтата. Ова не е одлука за помош на стопанството, туку враќање на времињата на транзицијата“,
вели тој.