Тоа е нова задача која се дава на еден од вицепремиерите за да се помогнат одредени процеси, иако примарната надлежност за сите инфраструктурни проекти е во Министерството за транспорт и врски, вели Битиќи
Согласни сме дека капиталните инфраструктурни проекти во државата слабо се реализираат и мора да се впрегнат сите сили, нема друга позадина во назначувањето на Артан Груби за координатор на изградбата на коридорот 8, патот Блаце-Скопје, пругата Кичево-Лин и граничните контроли кон Косово и Албанија. Вака вицепремиерот за економски прашања Фатмир Битиќи го објаснува назначувањето на Груби напоменувајќи дека не присуствувал на вчерашната владина седница.
Како што рече Битиќи во вечерашното гостувањето во емисијата „Вин – вин“ на телевизија Телма, тоа е нова задача која се дава на еден од вицепремиерите за да се помогнат одредени процеси, иако примарната надлежност за сите инфраструктурни проекти е во Министерството за транспорт и врски.
„Формално-правно гледано сите одлуки кои треба да помогнат и да поминат низ владините процедури поминуваат низ Комисијата за економски систем и тековни економски политики со која претседавам јас“,
вели Битиќи.
Тој додава дека не само Груби, туку секој од министрите што сака да помогне во одредени процеси за да се забрзаат одредени клучни активности за граѓаните, секогаш може да биде предложен за да земе дел од обрвските.
На прашањето дали назначувањето на Артан Груби за координатор на овие проекти значи дека „отаде Групчин“ за се ќе одлучува Демократската унија за интеграција и дека тоа се нивни проекти, Битиќи рече дека тоа се проекти за граѓаните.
„Ако тоа е проект на ДУИ, тогаш зошто не го направи во времето на ВМРО, туку во владеењето со СДСМ. Откога почна владеењето на СДСМ со ДУИ, приоритет на владата се интересите на граѓаните, а не тесните партиски интереси. Затоа велам дека тоа е проект за граѓаните подеднакво, независно во кој регион живеат да ги добијат услугите и работите кои ги заслужуваат“,
рече вицепремиерот за економски прашања.
Според него живееме во општество во кое покрај агендата што ја имаме заради функцијата која ни е дадена, некој повеќе, некој помалку ја користи и за политички цели, од партијата од која што доаѓаме, подвлече Битиќи и додаде дека тој лично јасно ја разграничува владината функција од партиската.
Владата на вчерашната седница го назначи Артан Груби за координатор кој ќе ги следи и ќе координира со сите активности во врска со реализацијата на коридорот 8.
Во вторникот, со свечена церемонија на автопатот Тетово – Гостивар, беше означен стартот на проектот за изградба на коридорите 8 и 10-д кои ќе ги гради американско-турскиот конзорциум „Бехтел и Енка“.
Овој проект за владините претставници е историски бидејќи тежи 1,3 милијарда евра, а делниците од двата коридори треба да бидат завршени до 2027 година.
Во рамки на коридорот 8 предвидена е изградба на неколку автопатски делници и тоа: Тетово – Гостивар – над 17 км (33 месеци рок на реализација); Гостивар – Букојчани – 30,3 км (57 месеци рок на реализација); Требениште – Струга – Ќафасан – 22 км (49 месеци рок на реализација). Во рамки на коридорот 10-д е изградба на делницата Прилеп – Битола – 40 км (57 месеци рок на реализација).
Досегашната постапка на проектот ја следат бројни контроверзии, особено околу изборот на надзорот, за што „360 степени“ и други медиуми интензивно известуваат во изминатиот период.