Настанот најавен како поставување камен-темелник за изградба на автопат Тетово-Гостивар помина без такво нешто. Симболично беше откриена информативна табла на која пишува: „Поставување камен-темелник на проектот“, но лопати и слично немаше
Премиерот порача дека изградбата на коридорите 8 и 10-д е најголемата инвестиција во инфраструктурата во земјава – проект кој, како што кажа, досега бил само на хартија и никогаш не бил реализиран од најразлични причини. Сега, рече Ковачевски, тоа се менува со Владата која инвестира и ќе продолжи да инвестира во проекти кои долгорочно ќе обезбедат економски раст на државата
И покрај големината на инвестицијата, тешка 1,3 милијарда евра, по денешното свечено одбележување на стартот на проектот за изградба на коридорот 8, не беа предвидени новинарски прашања за присутните на церемонијата
Изградбата на коридорите 8 и 10-д не е обична инвестиција, туку сериозен стратегиски подвиг и инвестиција во иднината. Ова беше главната порака што беше испратена од церемонијата во близина на првата патарина на патот Тетово-Гостивар каде што денеска официјално се означи почетокот на изградбата на коридорите 8 и 10-д.
Ако досега беше кружен тек, со Коридорот 8, Северна Македонија станува вистинска крстосница и неизбежна транспортна маршрута, не само во регионот туку и пошироко, порача премиерот Димитар Ковачевски кој прв застана на бината во форма на автопат и се обрати од говорницата на која симболично беше поставен бројот 8.
„Знам колку овој автопат е важен за нов економски и развоен импулс, не само на западниот дел од земјата туку и за регионален развој на целата држава. Изградбата на Коридорот 8 значи поврзување на државата со другите земји од Европа, значи странски инвестиции, економски развој на земјата, побрз трансфер на луѓе и стока, развиен туризам и пред сè безбедни и сигурни патишта за граѓаните“,
рече Ковачевски од церемонијата на поставување на камен-темелникот за коридорот 8.
Премиерот порача дека изградбата на коридорите 8 и 10-д е најголемата инвестиција во инфраструктурата во земјава – проект кој, како што кажа, досега бил само на хартија и никогаш не бил реализиран од најразлични причини. Сега, потенцира Ковачевски, тоа се менува со Владата која инвестира и ќе продолжи да инвестира во проекти кои долгорочно ќе обезбедат економски раст на државата.
По Ковачевски, на бината излезе првиот вицепремиер Артан Груби кој на настанот се појави облечен во маичка на која симболично се испечатени две патни ленти и бројот 8.
Груби им се заблагодари на актуелниот и експремиерот на Владата, на сите пратеници кои гласаа за посебниот закон за изградба на коридорот 8, на американската амбасадорка, а посебна благодарност упати до, како што рече, неговиот другар – директорот на Јавното претпријатие за државни патишта Ејуп Рустеми.
„Навистина сум многу горд што конзорциумот предводен од ‘Бехтел и Енка’ ќе ги гради коридорите 8 и 10-д и што со нив одбележуваме еден голем настан во градежништвото во земјата“,
кажа првиот вицепремиер.
На крајот од обраќањето, Груби упати посебна благодарност до, како што рече, еден човек „којшто ни го даде својот сон и ни овозможи да се реализира“.
„Драг претседателе, и оваа работа се заврши“,
рече Груби.
Следен на бината се качи лидерот на ДУИ, Али Ахмети, кој порача дека со изградбата на коридорите 8 и 10-д ќе се подобри животот на луѓето, ќе се напредува и директно ќе се влијае на економијата и развојот на државата.
„Со ова се поставуваат мостови меѓу целиот Балкан. Тоа е многу благородна работа што директно ќе служи за поцврсти пријателски односи и поцврсти врски во економиите и во поголема динамика во животот на луѓето. Ова е чудото и сакам да ѝ честитам на компанијата ‘Бехтел и Енка’ и што побрзо да се заврши програмата од нивната агенда“,
рече Ахмети.
Дека инвестицијата за изградба на коридорите 8 и 10-д не е обична, туку инвестиција во иднината на Северна Македонија, но и на сите земји поврзани со овие коридори, порача американската амбасадорка во земјава Анџела Прајс Агелер. Додаде дека денешниот ден е посебен ден за цела Европа.
„Би сакала да ѝ се заблагодарам на Владата, како и на претстаниците на ‘Беахтел и Енка’ и целите тимови за нивната работа, за нивните напори за финализирањето на сите потребни договори за да се започне со овој проект. Уверена сум дека работите ќе се движат брзо и успешно и дека луѓето од овој регион ќе бидат побрзо зближени и дека ќе им биде пријатно на оваа патна мрежа“,
рече во своето обраќање американската амбасадорка во земјава.
Претставникот на американско-турскиот конзорциум „Бехтел и Енка“, кој ќе ги гради коридорите 8 и 10-д, во своето обраќање од церемонијата рече дека компанијата е почестена што ќе работи со Владата на С Македонија, институциите и локалните власти на овој, како што рече, возбудлив проект, кој ќе ја подобри поврзаноста на регионот и ќе ја прошири локалната економија.
„Партнерството ‘Бехтел и Енка’ испорачува резултати за нашите клиенти. Имаме долга историја на успешно завршени висококвалитетни автопати на Балканот, како и навремено испорачување за да се осигури дека придобивката од автопатите ќе се почувствува што е можно побрзо. Ќе ги користиме локалните добавувачи, ќе обезбедиме вработување на локалното население, како и долгорочно снабдување на градежни работници кои ќе ни бидат достапни и за идните градежни потфати“,
рече претставникот на „Бехтел и Енка“.
И покрај големината на инвестицијата, тешка 1,3 милијарди евра, по денешното свечено поставување на камен-темелникот на коридорот 8 не беа предвидени новинарски прашања за присутните на церемонијата.
Настанот најавен како поставување камен-темелник за изградба на автопат Тетово-Гостивар помина без такво нешто. Симболично беше откриена информативна табла на која пишува: „Поставување камен-темелник на проектот“, но лопати и слично немаше.
Со денешната церемонија на поставување на камен-темелникот на коридорот 8 почнува спроведувањето на проектот за изградба на овој и на коридорот 10-д кои ќе ги гради американско-турскиот конзорциум „Бехтел и Енка“. Овој проект за владините претставници е историски бидејќи тежи 1,3 милијарда евра, а делниците од двата коридори треба да бидат завршени до 2027 година.
Проектот опфаќа изградба на вкупно 110 километри автопат или по делници: Тетово – Гостивар над 17 км (33 месеци рок на реализација); Гостивар – Букојчани – 30,3 км (57 месеци рок на реализација); Требениште – Струга – Ќафасан 22 км (49 месеци рок на реализација); Прилеп – Битола 40 км (57 месеци рок на реализација).
Досегашната постапка ја следат бројно контроверзии, особено околу изборот на надзорот, за што „360 степени“ и други медиуми интензивно известуваат во изминатиот период.