Веднаш по добиените пријави, полициски службеници преземаат мерки за безбедно евакуирање на објектите и во тек се антитерористички проверки, исто така се преземаат мерки за расчистување на случаите, велат од МВР
Од МВР не соопштуваат во кои училишта се испратени дојавите. Дел од медиумите пишуваат дека меѓу школите каде што има дојави се и средните училишта „Јосип Броз Тито“ и „Георги Димитров“ и средното медицинско училиште „Панче Караѓозов“
По вчерашното затишје, утрово на електронските адреси на 15 училишта во Скопје пристигнале дојави за поставени експлозивни направи, потврдија за „360 степени“ од Министерството за внатрешни работи.
Оттаму додаваат дека веднаш по добиените пријави полицијата презела мерки за евакуирање на учениците, наставните и другиот персонал во училиштата и дека во тек се антитерористички проверки.
„Денеска (14.12.2022) околу 08.30 часот во СВР Скопје било пријавено дека на електронските адреси на 15 училишта во Скопје е упатена закана за поставена експлозивна направа. Веднаш по добиените пријави, од полициски службеници се преземени мерки за безбедно евакуирање на објектите и во тек се антитерористички проверки и се преземаат мерки за расчистување на случаите“,
велат од МВР.
Инаку, станува збор за дојави за поставени бомби во најголем број училишта во главниот град досега.
Засега нема прецизни информации во кои училишта се испратени дојавите.
Дел од медиумите пишуваат дека меѓу школите каде што има дојави се и средните училишта „Јосип Броз Тито“ и „Герги Димитров“ и средното медицинско училиште „Панче Караѓозов“.
Во понеделникот дојави за поставени експлозивни направи беа испратени електронските адреси на девет училишта, како и на Министерството за надворешни работи, ГТЦ, „Џевахир сити“, ТЦ „Ист гејт“ е упатена закана за поставена експлозивна направа. По извршените антитерористички проверки беше утврдено дека дојавите се лажни.
Во понеделникот вакви пријави, за кои по проверките беше утврдено дека се лажни, имаше и во главниот град на Црна Гора, Подгорица каде што цел беа девет училишта, од кои шест основни и три средни.
Премиерот Димитар Ковачевски на вчерашната прес-конференција, одговарајќи на новинарски прашања изјави дека е речиси невозможно да се утврди од каде доаѓаат дојавите за бомби, бидејќи се испраќаат од т.н. ВПН-адреси (виртуелни приватни мрежи) кои се хостирани во странство.