„Ние ќе контролираме до каде е програмата, што се реализира и ако не гледаме реализација жестоко ќе реагираме во рамки на Советот“, рече Стефан Андоновски, советник во Град Скопје од ВМРО-ДПМНЕ и секретар за меѓународна соработка во партијата
Проектите од програмата „За модерно Скопје“ на градоначалничката Данела Арсовска не се реализираат оти од нејзина страна под сомнителни околности се поништуваат над 40 постапки на процеси на тендери за јавни набавки, вели Стефан Андоновски, советник во Град Скопје од ВМРО-ДПМНЕ и секретар за меѓународна соработка во партијата.
„На пример реализација на луна паркот во Скопје, имавте стар проект од Коце Трајановски, еден малку чуден проект на Петре Шилегов и имавте фузија на тие два проекти. Советот на град Скопје во полно мнозинство даде поддршка за овој проект, никаква реализација. Тука е кружниот тек на влезот во Сарај, паѓа тендерот неколку пати, не може да се реализира овој проект. Имате проекти за изградба на улици во Бутел, Карпош, требаше да има крупна реализација на булеварот Словенија, значи зборувам за голем број проекти кои произлегуваат од програмата на градоначалничката, ние ги вклучивме за оваа година, во ребалансот се префрлија средства за овие проекти, сите одлуки се донесоа и нема реализација“,
истакна Андоновски.
„Дел од нив по прекинувањето на тендерската постапка се менуваат комисиите, се додаваат нови членови на тие комисии, се менуваат одговорните лица и така натаму“,
додава тој.
Андоновски во гостувањето во вестите на Сител ТВ кажа дека Арсовска неколку месеци по стапувањето на функцијата градоначалник на Скопје освен на панел-дискусии и фотографирање неколку пати на еден ист проект, таа всушност не работи ништо. Единствено, како што кажа, биле сработени некои ситни проекти на почетокот на нејзиниот мандат, како на пример мапирањето и чистењето на депониите.
Тој нагласи дека поддршката која ВМРО-ДПМНЕ ѝ ја даде на Арсовска на локалните избори не е безусловна, туку, како што кажа, поддршка што се базираше на програма.
„Ние ќе контролираме до каде е програмата, што се реализира и ако не гледаме реализација жестоко ќе реагираме во рамки на Советот“,
рече Андоновски.
Освен нереализацијата на проектите од програмата, Андоновски додаде дека ниту меѓучовечките односи на градоначалничката не ѝ се јака страна, а тоа, како што посочи, говори фактот дека за десетина месеци откако е на функција од Градот си заминале над 45 луѓе.
„Уште на почетокот се виде дека меѓучовечките односи на градоначалничката не ѝ се јака страна. Имате изблици на ароганција, дрскост кон вработените, соработниците за што говори и фактот дека за десетина месеци откога е на функција од градот си заминале над 45 луѓе, а околу 20 луѓе кои јас ги познавам и беа ангажирани во тимот на градоначалничката си заминаа, ова зборувам за луѓе кои дојдоа со нејзиното доаѓање на позицијата“,
нагласи тој.