Основците и децата од претшколска возраст од понеделник ќе имаат можност да следат едукативни содржини на трите канали на националниот телевизиски сервис МРТВ, изведени од наставните програми по кои тие во моментов се едуцираат во училиштата и градинките.
Одлуката за ваков алтернативен начин за едукацијата на децата следува откако привремено се затворија градинките, училиштата и факултетите како дел од мерките на Владата за заштита на јавното здравје поради ризикот од ширењето на коронавирусот.
Ова решение е договорено на денешниот состанок во Министерството за образовани и наука (МОН), на кој присуствуваа претставници на неколку институции од областа на образованието, УНИЦЕФ, претставници на граѓански организации и претставници од менаџментот на Македонската радио-телевизија.
„Почнувајќи од понеделник, на трите канали на МРТВ, во соодветни термини во текот на денот за кои јавноста ќе биде информирана во најкус можен рок, наставници од основните училишта ќе реализираат скратени училишни часови на сите јазици на кои наставата се организира во училиштата во земјата. Оваа неформална едукација преку таканаречена ТВ-училница ќе се реализира сѐ до повторното отворање на училиштата и градинките и нормално продолжување на формалниот воспитно-образовен процес на учениците и децата од претшколска возраст. Посебна работна група е задолжена и веќе го реализира планот за успешен почеток и тек на спроведување на иницијативата“,
пишува во соопштението од МОН од каде што апелираат до наставниците да покажат интерес и волонтерски да се приклучат во реализацијата на оваа иницијатива.
Министерство информира дека во соработка со Бирото за развој на образованието и Центарот за стручно образование и обука, согласно одредбите од Законот за основното образование и Законот за средното образование, како и Министерството за труд и социјална политика, ќе подготват план за организирање на наставата до завршување на учебната година, за што повеќе детали ќе бидат споделени со јавноста во следниот период.