Тимчо Муцунски, кој е еден од кандидатите за пратеници на листата на ВМРО-ДПМНЕ во првата изборна единица, во вечерашното гостување во емисијата „Патот кон“ на Алсат, говореше за разликите помеѓу нивните и кандидатите на владејачкиот СДСМ.
Како што рече, кандидатските листи од неговата партија се 95 отсто составени со нови имиња во политиката, наспроти оние на СДСМ, кои на политичката сцена се присутни во последниве 20 години.
„За разлика од СДСМ, којшто понуди кадри коишто можеле да направат нешто во последните 20 години за Република Македонија, ВМРО-ДПМНЕ понуди кадри коишто ќе го обноват парламентаризмот во нашата држава, којшто во последните три години е во руина“,
рече Муцунски.
Актуелната вицепремиерка за економски прашања и потпретседателка на СДСМ, Мила Царовска рече дека нивните изборни листи се победнички, бидејќи го претставуваат граѓанското општество.
„Тука може да забележите претставници на сите етнички заедници, вклучително и на албанската етничка заедница. При тоа не зборувам за коалицијата со движењето Беса, која има позиции на листите, зборувам за Албанци, Бошњаци, Роми, Турци, кои се членови на СДСМ, истакнати членови коишто може да ја вратат довербата кај граѓаните дека оваа држава може да оди непред и да се развива и движи по патеката што ја воспоставивме како владејачка политичка партија. Сметам дека на овој начин треба да ја гледаме иднината на државата, во граѓански концепти, коишто се грижат листите навистина да го претставуваат општеството“,
рече Царовска.