Вицепремиерката Мила Царовска во вечерашната емисија „Патот кон“ на телевизија Алсат рече дека ѝ е драго што опозицијата од денеска ја менува реториката во однос на владините мерки за справување со коронавирусот.
„Мислам дека ова е одличен пресврт во опозиционата партија ВМРО-ДПМНЕ. До вчера излегуваа на прес-конференции, зборуваа за тоа како системот не функционира, како здравството не одговара и денеска сум среќна што признаваат дека Северна Македонија како и сите земји е погодена, но и дека се справува соодветно, одлично согласно можностите коишто ги имаме во овој момент“,
рече Царовска.
Според неа, важно е што здравствениот систем даде одговор на новонастанатата ситуација, а државата будно ги следи промените. На прашањето дали треба да се одложат изборите закажи на 12 април, таа ја остава одлуката на епидемиолозите.
„За тоа на крајот ќе одлучат експертите, епидемиолозите, затоа што јавното здравје е пред се и тука сметам дека навистина заеднички треба да се носат одлуките и да ја следиме ситуацијата и ако има таков ризик да се седне и тој да се дискутира заедно со сите затоа што сите заеднички го договоривме датумот, сите заеднички се договоривме да одиме на избори, токму затоа оваа одлука би била заедничка, но во овој момент гледам дека сите политички партии будно го следат ова затоа што пред се интересот ни се граѓаните и системот“,
додаде Царовска.