Материјали од предметот „Империја“, каде што е осомничен бизнисменот Орце Камчев, треба да се презентираат како материјални докази во предметот „Рекет“. Тие ќе бидат изведени како докази предложени од поранешната специјална обвинителка Катица Јанева, а потоа ќе следува и сведочење на обвинители што работеа во СЈО.
Меѓу првите на листата се Гаврил Бубевски, Ленче Ристоска, Фатиме Фетаи и Трајче Пеливанов. Ексобвинителката има предложено вкупно 13 сведоци.
Изведувањето на доказите и сослушување на сведоците на Јанева треба да започне од утрешното рочиште бидејќи денеска се очекува да заврши изведувањето на материјалните докази на Бојан Јовановски-Боки 13.
Меѓутоа, дел од доказите и од сведочењата на обвинителите ќе бидат затворени за јавноста бидејќи станува збор за искази и материјали за предмети отворени од СЈО кои се наоѓаат во предистражна или истражна фаза.
Инаку, на денешното рочиште, како што информиравме, Боки презентираше фотографии од Инстаграм и објаснува која марка облека и модни додатоци носи, како и датумот кога ги објавил фотографиите. Станува збор за околу 1 600 фотографии правени од 2013 до 2019. Со нив тој сака да докаже дека работите што му ги заплени обвинителството не се купени во втората половина на 2019 година, односно со парите од рекетот.
Од неговите докази ќе останат само резултатите од вештачењето на неговиот мобилниот телефон. Тие вчера неговиот адвокат Сашко Дукоски ги добил на УСБ од обвинителството, а веројатно ќе се презентираат во кон крајот на судскиот процес во дополнението на доказната постапка.