Според соопштението од кабинетот на Радев, тој порачал дека клучно за забрзување на европскиот пат на Северна Македонија е исполнување на копенхагеншките критериуми за членство во ЕУ, постигнување одржливи решенија за развојот на билатералните односи, како и вклучување на македонските Бугари во Уставот рамноправно со другите заедници. Прес-службата на бугарската Влада, пак, издаде само кратко соопштение за средбата на премиерот Петков со Донфрид, во кое не се споменува спорот што Бугарија го има со Северна Македонија
Донфрид кон крајот на април беше во посета и на Северна Македонија каде одржа средби со државниот врв и на прес-конференција во Скопје порача дека премногу се одолговлекува одржувањето на првата меѓувладина конференција со ЕУ
Помошник државната секретарка на САД за европски и евроазиски прашања Карен Донфрид денеска ја започна дводневната посета на Бугарија во рамки на која оствари средби со бугарскиот претседател Румен Радев и премиерот Кирил Петков.
Една од темите на кои разговарала со претседателот Радев, според соопштението од неговиот кабинет, била и бугарското вето за почеток на преговорите на Северна Македонија со ЕУ.
„Бугарија е најзаинтересирана за забрзување на преговорите за членство на Република Северна Македонија со ЕУ, но очекуваме јасни и недвосмислени правно-обврзувачки механизми и реални чекори за искоренување на говорот на омраза и случаите на дискриминација на граѓаните со бугарски идентитет“,
рекол шефот на државата на средбата со американската дипломатка, соопштија од неговиот кабинет.
Според соопштението, Радев порачал дека клучно за забрзување на европскиот пат на Северна Македонија е исполнување на копенхагеншките критериуми за членство во ЕУ, постигнување одржливи решенија за развојот на билатералните односи, како и вклучување на македонските Бугари во Уставот рамноправно со другите заедници.
„Во бугарското општество е формиран широк консензус на оваа тема, потврден од парламентот, а секое повлекување од ова ја загрозува стабилноста во самата земја-членка на ЕУ“,
рекол Радев.
Од неговиот кабинет наведуваат и други теми на кои се разговарало со Донфрид, меѓу кои и билатералните односи на САД и Бугарија, руската агресија врз Украина, заштитата на воздушниот простор на Бугарија, модернизација на армијата итн.
Прес-службата на бугарската Влада, пак, издаде само кратко соопштение за средбата на премиерот Петков со Донфрид, во кое не се споменува спорот што Бугарија го има со Северна Македонија.
„Двајцата разговараа за билатералната безбедносна соработка, унифицираниот одговор на НАТО на руската војна во Украина, заедничките енергетски проекти и мерките за справување со корупцијата“,
соопштија од бугарската Владата.
Во соопштението оттаму се додава дека денешниот разговор е продолжение на серијата средби на високо ниво помеѓу САД и Бугарија, откако премиерот Петков минатата недела го посети Вашингтон, каде се сретна со американската потпретседателка Камала Харис, државниот секретар Ентони Блинкен, претседателката на Претставничкиот дом, Ненси Пелоси и др.
Донфрид кон крајот на април беше во посета и на Северна Македонија каде одржа средби со државниот врв и на прес-конференција во Скопје порача дека премногу се одолговлекува одржувањето на првата меѓувладина конференција со ЕУ.
„Веќе премногу се одолговлекува одржувањето на меѓувладината конференција на С Македонија и Албанија со ЕУ, вие исполнивте тешки задачи и реформи и заслужувате брзо да напредувате. САД изразуваат пофалби за Северна Македонија за континуираните напори во постигнувањето на евроатлантската иднина и силно ги поддржуваме вашите аспирации и сакаме што побрзо да се одржи оваа конференција со Северна Македонија и Албанија“,
порача американската дипломатка при посетата на земјава на 28 април годинава.