Високиот претставник за надворешна политика на ЕУ го посочи членот 42.7 на Повелбата на ЕУ, кој е сличен на членот 5 на Повелбата на Северноатлантската Алијанса, и ги обврзува земјите членки на ЕУ да помогнат на земја мета на напад
Шефот на ЕУ дипломатијата Жозеп Борел потврди дека доколку Шведска или Финска станат цел на воена агресија од Русија пред да се зачленат во НАТО, ЕУ има слична одредба како членот 5 во НАТО.
Ова, како што јави МИА од Брисел, високиот претставник за надворешна политика на ЕУ го изјави на новинарско прашање за членот 42.7 на Повелбата на ЕУ. Овој член, сличен на членот 5 на Повелбата на Северноатлантската Алијанса, ги обврзува земјите членки на ЕУ да помогнат на земја мета на напад.
„Јасно пишува дека ако земја членка е нападната на нејзината територија, ако има воена агресија врз земја членка на ЕУ, таа земја може да побара од другите да и помогнат, и другите се обврзани да го сторат тоа, со сите средства, ни повеќе, ни помалку, но земјата мора да го побара тоа, ако побара, постои обврска во Повелбата, да се надеваме дека тоа нема да се случи никогаш“,
рече Борел на прес конференцијата денеска по министерскиот совет за одбрана во Брисел.
Земјите членки разговарале и за зголемувањето на буџетите за одбрана, при што тој оцени дека има подготвеност во ЕУ да се издвои повеќе за одбраната во ЕУ, но потенцираше дека тоа треба да се направи на добар и ефикасен заеднички начин. Од 2008, Европската Унија е во процес на разоружување и намалување на воените трошоци, но сега, рече Борел, се наоѓаме во различна ситуација откако започна војната во Украина и ЕУ треба да се “соочи со последиците“ и да го прекине трендот на разоружување.
Истовремено земјите на ЕУ ќе ја зголемат воената помош за Украина за уште 500 милиони евра, со што вкупниот износ од Европскиот Мировен Фонд за Украина ќе постигне две милијарди евра, рече шефот на ЕУ дипломатијата. Паралелно, земјите членки ќе продолжат и да и испраќаат оружје на Украина.
-Решивме да ја потврдиме преодната одлука за суспендирање на оперативниот тренинг на малиските воени сили во националната гарда и да ја суспендираме испораката на воена опрема под Европскиот мировен фонд, која беше во тек, ова не значи дека го напуштаме Сахел, сакаме да направиме повеќе и подобро, и за тоа ќе ги пренасочиме ресурсите во соседните земји, ќе го намалиме присуството во Мали, нема да има веќе воена обука, соопшти Борел.
Идната недела на земјите членки ќе им биде поднесена стратешка ревизија на мисијата во Мали, но нема да има укинување на истата, бидејќи за таква одлука е потребна едногласност на сите 27 земји членки, што е многу тешко да се постигне.