Од Јавно обвинителство велат и дека во текот на втората половина во 2021 година осомничениот белгиски државјанин, со намера да користи сексуални услуги од дете, во Белгија истражувал преку интернет и се информирал за деца до кои лесно може да пристапи
Јавното обвинителство ќе отвори истражна постапка против три лица, двајца родители од земјава и еден белгиски државјанин, постапувајќи по кривична пријава на МВР, кои се обвинети дека сториле кривично дело трговија со дете.
Според информации од МВР, белгискиот државјанин Л.Д.С. во временскиот период од февруари до мај 2022 година, со намера да овозможи вршење полови дејствија со дете или други форми на сексуална експлоатација во Белгија, со лицата Е.А. и Ф.Б., родители на детето, договорил склучување присилен брак помеѓу него и нивната малолетна ќерка, односно дете од неполни 14 години.
„Заради остварување на својата намера да го однесе детето во Белгија, Л.Д.С. во повеќе наврати престојувал на територија на Република Северна Македонија. Со цел да се обезбедат лични документи за патување за детето, Л.Д.С. на родителите на детето им дал околу 2 500 евра и во неколку наврати преку брз трансфер на пари од Белгија на Е.А. му испраќал парични средства во различен износ“,
појаснуваат од МВР.
Врз основа на издадени судски наредби од Основен кривичен суд Скопје, на 16.5.2022 е извршен претрес на дом и други простории каде што времено престојуваат Е.А. и Ф.Б. во Струга, од каде што е обезбеден доказен материјал за стореното кривично дело, додека на Меѓународен аеродром „Скопје“ е извршен претрес над лицето Л.Д.С., по што трите лица се лишени од слобода.
Истиот ден ОСОСК-СКИ-Националната единица за сузбивање криумчарење мигранти и трговија со луѓе до ОЈО за ГОКК поднесе кривична пријава против Л.Д.С. (38) од Белгија и Е.А. (33) и Ф.Б. (34) од Скопје, а со привремен престој во Струга, за сторено кривично дело „трговија со дете“.
Од Јавно обвинителство во денешното соопштение наведуваат дека во текот на втората половина во 2021 година осомничениот белгиски државјанин, со намера да користи сексуални услуги од дете, во Белгија истражувал преку интернет и се информирал за деца до кои лесно може да пристапи.
За да го оствари својот план, ја избрал РС Македонија и стапил во контакт со македонски државјанин кој го поврзал со останатите двајца осомничени, родители на шест малолетни деца. Првоосомничениот во повеќе наврати доаѓал преку ГП Меѓународен аеродром „Скопје“ каде што го пречекувале двајцата осомничени и нивните малолетни деца. Со цел да се стекнат со материјална корист и да заминат за Белгија, се подвлекува во соопштението, тие се согласиле за паричен надомест, на првоосомничениот да му овозможат да користи сексуални услуги врз тринаесетгодишната ќерка, а потоа и да склучи брак со неа.
„За таа цел, злоупотребувајќи ја својата положба како родители на малолетната жртва, му дозволиле на првоосомничениот да престојува заедно со нив во куќата во која живеело семејството. Тој манипулирал со девојчето дека го сака и ѝ подарил златен накит – бурма и златно синџирче, а на родителите им давал пари за потребите на семејството. Родителите на детето секојдневно му помагале на првоосомничениот со крајна цел под изговор за присилен брак да го однесе малолетното дете во Кралството Белгија каде што наводно ќе стапел во брак со неа и му овозможиле да создаде врска на доверба и емоционална близина со девојчето. Злоупотребувајќи ја нејзината доверба, првоосомничениот остварувал полови дејствија со девојчето до 16.05.2022 година кога полициските службеници го откриле настанот“,
се појаснува во соопштението од ЈО.
На предлог на јавниот обвинител, судијата на претходна постапка при Основниот кривичен суд Скопје денеска со решение на тројцата осомничени им определи мерка притвор во траење од 30 дена.
За кривичните дела што им се ставаат на товар на осомничените родители им се закануваат високи казни затвор во траење од најмалку десет, односно 14 години за белгискиот државјанин.