Во контекст на руската инвазија во Украина, вежбите се многу симболични за балтичките држави бидејќи имаат за цел да го тестираат нивниот капацитет да одговорат на сличен упад на непријателските сили
Денеска во Естонија започнуваат големи воени маневри на НАТО, кои се сметаат за едни од најголемите одржани воени вежби во историјата на Балтикот
Вежбите ќе се одржат во Естонија во текот на следните две недели и во нив ќе учествуваат 15 000 војници од десет земји, меѓу кои британски, американски, фински и шведски, јави Би-би-си.
И покрај тоа што воените вежби беа планирани многу пред Русија да ја започне својата инвазија на Украина, тие ќе се одржат во време на значително зголемени тензии меѓу НАТО и Москва.
Во контекст на руската инвазија во Украина, вежбите се многу симболични за балтичките држави бидејќи имаат за цел да го тестираат нивниот капацитет да одговорат на сличен упад на непријателските сили.
Во меѓувреме, естонската министерка за надворешни работи Ева-Марија Лиметс изјави дека влезот на Шведска и Финска во НАТО ќе ја зголеми безбедноста на Балтикот.
„Кога гледаме дека во нашето соседство и други демократски земји припаѓаат на НАТО, тоа би значело дека може да имаме пошироки заеднички вежби и исто така поголема одбранбена соработка“,
истакна таа во Берлин, каде што присуствуваше на состанок со колеги од други држави членки на Алијансата.
Лиметс се надева оти Шведска, Финска и Турција ќе ги надминат разликите во мислењата околу влезот на нордиските земји во Алијансата додавајќи дека атмосферата на состанокот во Берлин била полна со поддршка.
„Видовме некои разлики, но исто така видовме подготвеност на тие земји да ги надминат разликите“,
појасни Лиметс.
Шефицата на естонската дипломатија, Лиметс, појасни дека Естонија го цени тоа што НАТО го зајакнува своето присуство на Балтикот, но исто така додаде оти би сакала сојузниците да почнат да ја зајакнуваат и својата одбрана, а не само присутноста. Тоа, пак, нагласи министерката, би значело посилно присуство на копнени сили, но и воздушна и поморска одбрана.