Словенечката полиција, пак, засега објави дека загинатите сè уште не се идентификувани, но оти се знае дека тројца се странски државјани
Меѓу петтемина загинати во вчерашната експлозија во фабриката за хемиски производи „Меламин“ во словенечкиот град Кочевје има и еден државјанин на Северна Македонија, објавија денеска словенечки медиуми.
Како што соопшти полициската управа на Љубљана, од другите четворица загинати двајца се Словенци, а двајца државјани на БиХ.
Според словенечката полиција, загинатите сè уште не се идентификувани, но се знае дека тројца од нив се странци.
Началникот на Одделението за општ криминал при СВР Љубљана, Валтер Зрински, изјави дека засега сè уште не може да потврди дали причина за експлозијата е човечка грешка.
„Службеници на криминалистичката полиција продолжуваат да вршат увид на местото на настанот за да им помогнат на форензичарите да ја утврдат точната причина која довела до овој немил настан“,
нагласи Зрински додавајќи дека кога ќе имаат издржани заклучоци од наодите ќе го известат надлежното јавно обвинителство.
Експлозијата во Кочевје, гратче со околу 8 000 жители во јужна Словенија, се случи вчера околу 8:30 часот, по што надлежните веднаш им препорачаа на локалните жители да ги затворат прозорците и да не излегуваат надвор, иако нагласија дека нема опасност од загадување на животната средина.
Фабриката „Меламин“ е основана во 1954 година и вработува околу 200 работници, а името го носи по хемикалијата што ја произведува која е наменета за покривање подови и мебел.