Важноста на Колективниот договор за градинките истекува во јуни, па денеска на средбата се разговарало и за новиот кој, велат од Министерството, треба да понуди нови решенија кои ќе значат унапредување на предучилишното згрижување и воспитување на децата
Заврши денешната средбата помеѓу Министерството за труд и социјална политика (МТСП) и Синдикатот на образованието, науката и културата (СОНК), а следната рунда преговори е договорена за наредната недела на 17 мај.
На состанокот на кој присуствуваа и министерката Јованка Тренчевска и синдикалниот лидер Јаким Неделков, како што соопштија од МТСП, се разговарало за барањата кои се дел од одлуката за штрајк на вработените во детските градинки, а за кои во изминатиот период не била отворена дискусија, како и за платите на вработените за време на штрајк.
На следната средбата, велат, ќе се продолжи со дијалогот за да се најде решение кое ќе биде во рамки на законските прописи.
Од МТСП додаваат и дека страните разговарале и за формирање на работна група за нов Колективен договор за предучилишните установи, чија важност истекува во јуни. Новиот Колективен договор, потенцираат од Министерството, треба да понуди нови решенија кои ќе значат унапредување на предучилишното згрижување и воспитување.