На состанокот со американскиот генерал Емдрусјак, се зборувало и за тоа што кон крајот на мај Северна Македонија и САД ќе го започнат Стратегискиот дијалог кој, вели министерката, опфаќа широк спектар на теми и кој уште повеќе ќе го подигне нивото на соработка
Ќе продолжиме со инвестициите на армискиот полигон Криволак и со модернизација на опремата, порача министерката за одбрана, Славјанка Петровска, на средба со заменикот командант на копнените сили на САД за Европа и Африка, Генерал-мајор Петер Ендрусјак.
„Но, најважно инвестираме во човечките капацитети во нивна висока мотивација. Овие нешта се високо на агендата на Министерството за одбрана и на Генералштабот“,
порачала Петровска на средбата.
Средбата на Петровска со Ендрусјак, на која присуствувал и началникот на Генералштабот на Армијата генерал-потполковник Васко Ѓурчиновски, е во период кога на Криволак се изведува досега најголемата воена вежба „Брз одговор 22“ („Swift Response 22“).
„Петровска најнапред на средбата изрази благодарност за присуството на генералот на досега најголемата вежба ’Брз одговор 22‘ одржана во Република Северна Македонија и задоволство од денешниот приказ и реализација која се реализира на армискиот полигон Криволак. Во тој контекст министерката рече дека ќе се продолжи со сериозни инвестиции на овој полигон кој ќе нуди можност за изведување и реализација на различни видови вежбовни активности и на кој може истовремено да се зајакнува интероперативноста помеѓу армиите“,
велат од Министерството за одбрана.
Генералот Ендрусјак, пак, како што соопштија оттаму, се заблагодарил за поканата да присуствува на вежбата и посочил дека сето она што се планира за одбраната во поглед на модернизацијата и инвестициите во капацитетите е од особена важност за војниците, а во поглед на Криволак потенцирал дека полигонот има голем потенцијал.
На состанокот, се зборувало и за тоа што кон крајот на мај Северна Македонија и САД ќе го започнат Стратегискиот дијалог кој, вели министерката, опфаќа широк спектар на теми и кој уште повеќе ќе го подигне нивото на соработка.