Мицкоски за отворањето на културниот клуб „Ванчо Михајлов“ во Битола: Петков да отвори најмалку два клуба за Македонците од Пиринска Македонија

Мицкоски ги повика и меѓународната заедница и Брисел да стават крај на овие, како што рече, неевропски егзибиции од страна на официјална Софија

Лидерот на ВМРО-ДПМНЕ, Христијан Мицкоски, одговарајќи на новинарско прашање поврзано со културниот клуб „Ванчо Михајлов” во Битола, рече дека Петков прво што треба да направи кога ќе се врати во Софија е да отвори најмалку два вакви клуба во Благоевград и Сандански за Македонците што живеат во Пиринска Македонија.

„Гледам и дека потпретседателот на Бугарија продолжува со неевропските вредности и негирањето на македонското малцинство во Пиринска Македонија и тоа навистина нема никаква врска со европските вредности кои овие политичари треба да ги промовираат. Напротив, нѐ враќаат во едни минати времиња, во времињата на бугарската фашистичка окупација за време на Втората светска војна овде во Македонија, на жртвите кои македонскиот слободарски народ ги има дадено за да создаде своја демократска држава и да можеме ние денеска да го живееме ова што го живееме и да се ослободи од еден таков фашистички окупатор каков што бил бугарскиот за време на Втората светска војна“,

изјави Мицкоски.

Време е за реципроцитет од нашиот источен сосед и почитување на правата на Македонците во Бугарија, вели Коњановски по отворањето на културниот клуб „Ванчо Михајлов“ во Битола

Тој додаде дека по ваква провокација не знае кој ќе седне да преговара за решавање на спорот.

„Јас после оваа провокација и овие изјави дадени овде во Македонија навистина немам што да додадам, освен со чудење да констатирам дека не знам кој е тој политичар или историчар кој ќе седне на маса заедно со неговите колеги од кај нашиот источен сосед и да продолжи да преговара за постигнување договор барем до јуни. Ако ова е да си најдат некаков изговор зошто повторно да ја блокираат Македонија, тогаш се прилично успешни“,

додаде Мицкоски.

Мицкоски ги повика и меѓународната заедница и Брисел да стават крај на овие, како што рече, неевропски егзибиции од страна на официјална Софија бидејќи овде во Македонија, според него, „нема кого повеќе да повикува бидејќи станува збор за некредибилни политичари кои освен криминал, корупција, срам и безидејност, друго не знаат што да прават“.

Ѓоргиев за „Дојче Веле“: Се рушат и последните надежи за пристоен дијалог

„Од овде од Илинден, ја повикувам и Европската унија и официјален Брисел да стави крај на овие фашизоидни и хегемониски намери од страна на нашиот источен сосед да направи притисок и да овозможи Македонија конечно да ги почне преговорите. Овој народ тоа го заслужува бидејќи многу пати во историјата се покажал дека стои рамо до рамо со европските вредности“,

рече Мицкоски.