Станавме посилно интегрирани во евро-атлантската заедница, како сојузници со најголемите и најсилни држави, најсозреани и најстабилни демократии со кои споделуваме заеднички вредности, оценува министерот Османи
За министерката за одбрана, Славјанка Петровска, и шефот на дипломатијата, Бујар Османи, денешниот датум – 27 март е еден од најважните во историјата на државата бидејќи се остави стратешката цел – членството во НАТО.
Двајцата преку свои објави на социјалните мрежи се огласија по повод две години од официјалното пристапување на Северна Македонија во најголемиот воено-политички сојуз на светот, Северноатлантската Алијанса.
„Република Северна Македонија две години членка на НАТО. Денешниот датум е во редот на најважните од независноста на државата, ден кога ја заокруживме стратешката цел – членство во најмоќниот воено политички сојуз. Заедно сме посилни!“,
порача Петровска.
Османи, пак, во пораката наведе дека членството е историски успех и силна гаранција за нашата безбедност стабилност и просперитет.
„Денес, одбележуваме две години од членството на Северна Македонија во НАТО, наше најголемо надворешно – политичко достигнување и најзначајна политичка верификација на нашата државност. Нашето знаме се вее заедно со другите 29 знамиња на НАТО – сојузниците, сведочејќи за единството и солидарноста меѓу партнерските земји во овие времиња на безбедносни предизвици со кои се соочуваме. Станавме посилно интегрирани во евро-атлантската заедница, како сојузници со најголемите и најсилни држави, најсозреани и најстабилни демократии со кои споделуваме заеднички вредности. Застанавме рамо до рамо со најмоќните држави во светот и рамноправно придонесуваме за зајакнување на мирот и стабилноста во регионот и светот“,
вели шефот на дипломатијата.
Во актуелните околности, додава министерот, најважно е да имаме вистински пријатели и сојузници со кои заеднички ќе ги обликуваме значајните одлуки и ќе придонесуваме за нашата заедничка безбедност.