Градоначалникот на Херсон, Игор Коликаев, утрово информира дека многу луѓе загинале, вклучително и украински војници и цивили
Украинското Министерство за одбрана ги демантираше информациите дека јужниот град Херсон паднал во рацете на Русите, јави дописникот на Си-ен-ен од Киев.
„Според информациите од нашата бригада, во моментов се водат борби. Градот не е целосно заземен, некои делови се под наша контрола“,
изјавил портпаролот на украинското Министерство за одбрана.
Руското Министерство за одбрана претходно соопшти дека руски војници го зазеле градот Херсон во јужна Украина. Според руски извештаи, руските сили синоќа влегле во Херсон и руската армија синоќа била на улиците на градот.
Градоначалникот на Херсон, Игор Коликаев, утрово информира дека многу луѓе загинале, вклучително и украински војници и цивили, а владините претставници сега се обидуваат да обезбедат луѓето да го напуштат градот или да се засолнат.
„Синоќа додека јас и мојот тим бевме во градското собрание, зградата беше гранатирана. Сите се живи. Но, повторно ве замолувам: не излегувајте од дома. Не предизвикувајте пукање со вашите постапки и однесување. Ние сме во многу тешка ситуација, нема потреба да ја влошуваме. Денеска ќе работам за да најдам начин како да се соберат мртвите, како да се вратат струјата, гасот, водата и топлината каде што се оштетени. Но, веднаш ве предупредувам: да ги исполниш овие задачи денес значи да направиш чудо. Сега сите чекаме чудо. Тоа ни треба“,
напиша Коликаев на Фејсбук.
Тој побара помош од сите медиуми да се воспостави „зелен коридор“ во градот преку кој би се евакуирале ранетите, да се изнесат загинатите и да се достават лекови и храна до градот.
„Внимание до сите медиуми – херсонски, регионални, украински, светски! Сите новинари кои ме познаваат, кои го сакаат Херсон, се грижат за неговата судбина, ве молам искористете ја моќта на својата четврта власт и помогнете ни да добиеме ‘зелен коридор’ за изнесување на повредените и мртвите, транспорт на лекови и храна до градот. Без сето тоа, градот ќе пропадне“,
напиша Коликаев на Фејсбук.
„Сметам на пријателското учество на новинарите и нивните врски не само со украинските, туку и со светските политичари. Помогнете му на Херсон да добие можност да го спаси својот народ од претстојна хуманитарна катастрофа!“,
додаде тој.