Летовите за руските авиони не се забранети во Босна и Херцеговина, Србија, Белорусија и Турција. На оваа листа се најде и Црна Гора, но се очекува и таа наскоро да го затвори небото со оглед на тоа што е најавено дека ќе донесе одлука за ова прашање
САД наскоро ќе го затворат својот воздушен простор за руски авиони, најави во годишното обраќање, американскиот претседател Џо Бајден.
„Најавувам дека ќе им се придружиме на нашите сојузници во затворањето на воздушниот простор на САД за сите руски летови, дополнително изолирајќи ја Русија и додавајќи дополнителен притисок врз нивната економија“,
рече Бајден во обраќањето за состојбата во државата.
Ова се очекува да се случи во следните 24 часа, а некои летови од Русија до САД се веќе откажани.
Европските земји и Канада веќе го затворија сопствениот воздушен простор за авионите од Русија.
Поголемиот дел од Европа го затвори својот воздушен простор за летови на руски авиокомпании и приватни авиони од Русија, како дел од санкциите кон Москва поради нејзината агресија врз Украина. Една од ретките земји чиешто небо се уште е отворено за руските авиони е Србија.
Меѓу земјите кои го затворија својот воздушен простор за руските авиони и авиокомпании се главно земји од Европската унија. Тоа се Германија, Франција, Ирска, Исланд, Шпанија, Португалија, Белгија, Данска, Луксембург, Холандија, Полска, Чешка, Словачка, Австрија, Унгарија, Хрватска, Словенија, Грција, Италија, Малта, Романија, Бугарија, Литванија , Естонија, Летонија, Шведска и Финска.
Летовите беа забранети и од земји кои не се членки на ЕУ, како Норвешка, Албанија, Северна Македонија и Швајцарија, но и Обединетото Кралство, кое беше меѓу првите што ја донесе таа одлука.
Покрај Украина, каде што војната трае веќе шест дена, воздушниот простор за сите летови го затвори и Молдавија, земјата со која Украина ја дели границата.
Само четири земји немаат воведено забрана
Од друга страна, летовите за руските авиони не се забранети во Босна и Херцеговина, Србија, Белорусија и Турција. На оваа листа се најде и Црна Гора, но се очекува и таа наскоро да го затвори небото со оглед на тоа што е најавено дека ќе донесе одлука за ова прашање.
Практично единствениот начин да се стигне до Москва од Европа е со авион преку Белград, од каде авионите летаат за Турција, а потоа преку Казахстан до еден од московските аеродроми.
Русија одговори на овие мерки со забрана на авиокомпании од 36 земји да го користат нејзиниот воздушен простор.