Украинскиот парламент, исто така, денеска, во прво читање, гласаше за закон што на Украинците им дозволува да носат оружје во самоодбрана
Украина денеска прогласи 30-дневна вонредна состојба поради воените тензии на источната граница со Русија, изјави секретарот на Државниот совет за национална безбедност Олексеј Данилов, јави ДПА.
„Овој потег може да значи дека на Украинците ќе им биде наредено да останат дома или ќе бидат ставени под полициски час“,
рече Данилов.
Земјата е пред амбис по руската одлука да ја признае независноста на двата сепаратистички региона во Источна Украина и по одобрувањето да се испратат војници за да се спречи, како што Кремљ го нарекува, геноцид врз етничките Руси.
Украина денеска почна да мобилизира резервисти на возраст од 18 до 60 години, со максимален работен период од една година.
Украинското Министерство за надворешни работи денеска ги предупреди Украинците да не патуваат во Русија и ги повика своите граѓани што се веќе таму да ја напуштат земјата.
„Министерството за надворешни работи им препорачува на граѓаните на Украина да се воздржат од какво било патување во Руската Федерација, а оние што се во таа земја веднаш да ја напуштат нејзината територија“,
соопшти Министерството.
Украинскиот парламент денеска одобри санкции против 351 Русин, вклучувајќи и пратеници кои гласаа за признавање и испраќање руски војници.
Ним им е забранет влез во Украина, пристап до имот, капитал, недвижен имот и лиценци за вршење деловни активности.
Мораме да побараме од Советот веднаш да воведе санкции против криминалците, против сите пратеници во Думата кои гласаа за распарчувањето на Украина, рече Ирина Херашченко од Европската партија за солидарност.
Санкциите формално ги воведува Украинскиот совет за одбрана и национална безбедност.
Минатата недела 351 руски пратеник побараа од претседателот Владимир Путин да ја признае независноста на двете самопрогласени републики во источна Украина контролирани од проруските сепаратисти. Путин одлуката ја донесе во понеделникот.
Украинскиот парламент, исто така, денеска, во прво читање, гласаше за закон што на Украинците им дозволува да носат оружје во самоодбрана.
„Донесувањето на овој закон е во интерес на државата и општеството“,
истакнал еден од авторите на законот, додавајќи дека тој е потребен поради „постојните закани и опасности за граѓаните на Украина“, пренесуваат тамошните медиуми.