Планираме да направиме еден пресек на степенот на реализација, меѓутоа, се разбира, дека ќе ги отвориме и другите прашања, пред се поддршката во однос на европските интеграции и секторската соработка, изјави шефот на македонската дипломатија, најавувајќи ја посетата на грчкиот колега во наредните денови
Шефот на дипломатијата на Грција Никос Дендиас кон крајот на месецот доаѓа во посета на Северена Македонија, при што ќе се направи и евалуација на спроведувањето на обврските од Преспанскиот договор, а ќе се разговара и за поддршката на Атина во однос на нашата евроинтеграција, најави денеска министерот за надворешни работи Бујар Османи.
„Ова е важна повратна посета, после мојата во Атина, и зборува за интензитетот на комуникацијата на високо ниво, што е одраз на добрите билатерални односи меѓу нашите држави, кои се и повеќе од само имплементирање на Преспански договор, кој предвидува стратешко партнерство меѓу нашите две држави, што ние тоа во континуитет го градиме и го подобруваме и во политичкиот и во економскиот контекст“,
рече Османи.
Посочи дека во МНР е формирана работна група со координатир за следење на имплементацијата на Преспанскиот договор, така што тековно се следат нашите обврски.
„Тоа не се само обврски од членот 8, кои значат промена на ознаките, таблите…, туку и во делот на Комисијата за заштита на трговските марки, што е многу важно прашање, бидејќи колку побрзо ќе се реши прашањето за трговските марки толку ќе бидем,е можеби, во подобра позиција во однос на заштитата на трговски марки или, пак, во однос на Комисијата за образовни прашања. И четвртиот дел е секторската соработка која, исто така, е предвидена во рамки на Преспанскиот договор“,
рече Османи.
Предвидено е на средбата со Дендиас, наваде Османи, да се направи евалуација на степенот на имплементација на обврските што ги има и државата, меѓутоа и на обврските што ги има Грција.
„Планираме посуштински и посистематски да влеземе по однос на сите прашања, со цел да направиме еден пресек на степенот на реализација, меѓутоа, се разбира, дека ќе ги отвориме и другите прашања, пред се поддршката во однос на европските интеграции и се разбира секторската соработка во контекст на стратешкото партнерство„,
изјави Османи.