Министерот за здравство, Венко Филипче, вели дека четвртиот бран од ковид-пандемијата во кој влезе земјава веројатно нема да е последен, но и дека тие не може да се споредуваат меѓу себе, бидејќи зависат од различни фактори.
„Очекувано беше дека ќе се случи четвртиот бран, бидејќи тоа се случи и во другите земји кои имаа порестриктивни мерки од нашите. Но, не може брановите да се споредуваат меѓу себе. Овој бран сега е многу поразличен од претходните, бидејќи имаме одреден процент на вакцинирани лица, но и лица кои веќе ја прележале болести. Секој бран што веројатно и понатаму ќе се појавува ќе зависи од повеќе фактори, вклучувајќи го и тоа каков сој ќе се појави“,
вели Филипче во вечерашното гостување на Канал 5.
Според него, не биле потребни порестриктивни мерки додека епидемиолошката ситуација беше мирна бидејќи, како што рече, многу европски земји кои имале рестриктивни мерки се соочиле со нов бран и зголемен број заразени.
Филипче повторно апелирше до граѓаните да се вакцинираат и рече дека имунитетот стекнат со вакцинација повеќе штити отколку имунитет стекнат по природен пат со прележување на болеста.
„Препораките кои ги комуницирам во јавноста преку алатките на Министерството за здравство се должат на препораките на сознанијата на стручни лица, а тоа се имунолози кои работат со вакцина, фармаколози, професори на фармацевтскиот факултет и од тука се препораките. Има една студија што вели дека оние кои се вакцинирани можат да заболат со ризик од 0,07 проценти, а 1,2 отсто од прележаните можат да заболат. Што значи дека кај нив е поголем ризикот и од тука таа препорака за кратко време од прележувањето, околу еден месец, да се вакцинираат“,
вели Филипче.