Новите мерки на Владата за заштита од ковид – 19 и задолжителниот сертификат како доказ дека гостите се вакцинирани со барем една доза вакцина придонесе угостителските објекти во Кичево да го преполоват прометот, а дел од угостителите да заминат на колективен одмор.
„Бидејќи во нашите локали поголемиот број на гости се помлади лица, познато беше од порано дека повеќето од нив се немаат вакцинирано против ковид-19, што ги оневозможува да бидат наши гости. Затоа од стапувањеето во сила на новите мерки прометот е намален за 50- 60 отсто“,
велат вработени во повеќе локали во градот.
Дел од угостителите ја искористија можноста во наредните три недели да заминат на колективен одмор. По враќањето од одмор очекуваат поголемиот број млади да бидат вакцинирани и да се стекнат со неопходниот сетификат.
„Деновиве имаме голем број помлади лица кои сакаат да се вакцинираат против ковид-19. Бидејќи дневно вакцинираме од 300 до 400 претежно помлади пациенти, очекуваме во наредните три седмици да бидат вакцинирани над 4 000 наши сограѓани претежно под 40 годишна возраст“,
вели Мира Мососка од Здравствениот дом во Кичево.
По зголемениот обем на вакцинација кај помладите тие ќе бидат во можност да го добијат задолжителниот сертификат за вакцинација и без проблеми да бидат гости во некој од угостителските објекти.