Одговарајќи на прашање дали ќе се ревидира одлуката поради континуираниот пораст на новозаразени со коронавирус, откако на социјалните мрежи се појавија реакции на одлуката за физичка настава, додека бројката на заразени е во пораст, миниистерката апелира да не се шират неточни информации
МОН и Министерството за здравство дневно ја следат состојбата и доколку добиеме препорака за промена, во истиот момент ќе бидеме спремни да промениме се што ќе ни биде кажано, изјави денеска министерката Мила Царовска, повторувајќи дека од 1 септември училиштата ќе бидат отворени за сите ученици и дека тоа е прво и најпосакувано од трите сценарија за почеток на новата учебна година.
„Нема потреба од ширење паника и неточни информации“,
рече Царовска во одговор на прашање дали ќе се ревидира одлуката поради континуираниот пораст на новозаразени со коронавирус, откако на социјалните мрежи се појавија реакции на одлуката за физичка настава, додека бројката на заразени е во пораст.
„Најнепосакувани се второто и третото сценарио – наизменично физичка настава и онлајн и само онлајн како лани. Како што препорачуваат и од УНИЦЕФ и ОЕЦД и сите други земји кои се поразвиени од нашата, физичкото присуство е најпосакувано и најсоодветно и ние се подготвуваме за овој модел на настава, согласно препораките и на Кризниот штаб и одлуката на Владата. Во даден момент, доколку Комисијата за заразни болести утврди дека треба да го менуваме моделот, ние сме подотвени за сите три сценарија“,
рече Царовска.
Претставничката на УНИЦЕФ во земјава Патриција Ди Џовани го повтори она што го кажа и во вчерашното соопштение дека е најдобро за учениците училиштата да бидат отворени и што подолго да останат отворени и дека за заштита од вирусот ќе важат истите антиковид-мерки што важат и за целата заедница.
„Планот е да почнеме со 100 отсто ученици да се вратат во училишните клупи, а понатаму ќе видиме. Она што е најдобро за заедницата е најдобро и за училиштата. Мерките што важат за сите, треба да важат и за училиштата. Треба да се трудиме вирусот да биде настрана од цела заедница, не само од училиштата“,
рече Ди Џовани.
Додаде дека МОН со општините напорно работат да обезбедат услови за лесно преминување на онлајн-настава доколку има зголемување на случаите на зараза.