Сите банки и штедилници прифатиле да им се овозможи на граѓаните кои останаа со неважечки лични карти да може да ги користат услугите со приложување на пасоши
Владата направила договор со Македонската банкарска асоцијација (МБА) за граѓаните кои немаат важечки лични карти да можат да подигнат пари од банките или да вршат други трансакции со пасоши.
„Граѓаните кои немаат важечки лични карти ќе може да ги користат услугите на банките и штедилниците со пасоши, а како важечки ќе се земат и потврдите од МВР за поднесено барање за издавање нова лична карта“,
напиша Заев на Фејсбук.
Тој вели дека сите банки и штедилници прифатиле веднаш да го применуваат ваквиот начин на идентификување на клиентите коишто немаат валидна (важечка) лична карта, овозможувајќи им непречено користење на своите услуги и производи.
„Со министерот за внатрешни работи и со целата Влада ќе најдеме и системско и целосно решение и начин и да го обезбедиме уставно загарантираното право граѓаните да не бидат исклучени од избирачкиот список заради застарените лични карти и во соработка со Државната изборна комисија (ДИК) ќе се направи сè за да се изнајдат законски можности за граѓаните со неважечки лични карти да можат да го остварат своето основно демократско право, да можат да гласаат на избори“,
додава Заев.
Тој ги обвини опизициските партии Левица и ВМРО-ДПМНЕ дека блокираат закони во Собранието кои се од секојдневно значење за граѓаните.
„Тие блокираат, ние наоѓаме решенија. Секогаш ќе правиме максимум за решенија против блокадите што во Собранието ги прават Левица или ВМРО-ДПМНЕ кога блокираат закони и политики од секојдневен, животен интерес на граѓаните. Граѓаните не сакаат кочење, деструкции, уназадување, режим“,
вели Заев.