Истечените документи за лична идентификација им создаваат проблеми на дел од граѓаните кои не можат да подигнат плати, пензии, социјална помош од банките или да прават какви било трансакции
Донесувањето на измените на Законот за лични карти предложени од Беса со кои се внесува етничката определба, но со одложено стапување во сила во 2023 година, се блокирани од голем број амандмани од Левица
Не фалат обрасци за лични карти, системот е добар, само треба да се изгласа Законот за лични карти, напиша министерот за внатрешни работи Оливер Спасовски на неговиот ФБ профил, по реакциите во јавноста дека истечените документи за лична идентификација им создаваат проблеми на дел од граѓаните кои не можат да подигнат плати, пензии, социјална помош од банките или да прават какви било трансакции.
„Не обвинувам, само ги повикувам тие што се платени од граѓаните да ја вршат работата, да го изгласаат Законот за лични карти, бидејќи овој проблем покренува многу проблеми во секојдневното функционирање и мора да бараме излезно решение за да граѓаните ги остварат своите права“,
напиша Спасовски и апелира секој одговорно да пристапи – член на парламент, Влада или локална самоуправа да им служи на граѓаните за, како што напиша, да можеме да работиме.
За проблемот со истечените лични карти денеска зборуваше и премиерот Зоран Заев. Тој беше конкретен дека Законот за личните карти е блокиран со амандмани од Левица на измените што ги предлага Беса, и покрај тоа што, како што вели, Беса се согласила тие да бидат со одложено дејство од 2023 година за внесувањето на етничката определба на граѓаните во личните карти, очекувајќи Европа да се изјасни по ова прашање.
Според податоците што Заев ги кажа денеска, поднесени се преку 40 илјади барања за лични карти, некои од нив за ваков документ по прв пат.
Единствено логично решение, според него, е парламентот од 1 септември да го донесе законот и да се издадат тие лични карти, а втора опција е Министерството за правда, заедно со другите надлежни ресори, да работи на изнаоѓање начин, со одлуки, правилници или критериуми, да дадат можност и со истечена лична карта да се гласа, затоа што сите граѓани немаат пасош (како алтернатива за идентификација на избори).
За тоа како ова би се одразило на остварувањето на правото на граѓаните на глас на локалните избори што претстојат, Заев е уверен дека ќе се изнајде решение.
„Во пракса и во минатото, со истечена лична карта, поради неможност да се издаде лична карта или од распишувањето на изборите кога е истечена личната карта, се даваше можност и со истечен рок на важење на ваквите лични документи да се гласа“,
рече денеска Заев, додавајќи дека едно е радикално размислување и неодговорно однесување, но дека не може да разбере „да се нанесува штета на народот“.