Според последните информации од повеќе извори, сите граѓани што биле пријавени за евакуација и евидентирани како наши граѓани, веќе го имаат напуштено Кабул и во моментот се наоѓаат на неколку локации, вели премиерот Заев
Сите наши граѓани планирани за евакуација се извлечени од Авганистан и во моментот немаме информации за наши државјани што се во загрозувачка ситуација или на кои им е потребна асистенција за евакуација, изјави денеска премиерот Зоран Заев.
Според последните информации од повеќе извори, потенцира тој, сите граѓани што биле пријавени за евакуација и евидентирани како наши граѓани, веќе го имаат напуштено Кабул и во моментот се наоѓаат на неколку локации.
Најголемиот дел, преку 30 наши граѓани се наоѓаат во Велика Британија, над 20 граѓани се во Доха, Катар, од каде што во наредните денови ќе бидат транспортирани кон европските центри. Нашите граѓани што се наоѓаа во базата на НАТО во Кабул вчера го напуштија Авганистан и се наоѓаат во Осло, Норвешка, изјави Заев во Јегуновце, каде што заедно со министерката за образование и наука Мила Царовска и градоначалникот на Општина Јегуновце, Дарко Блажески, присуствуваа на пуштање во употреба на спортската сала во ООУ „Александар Здравковски”.
Заев додаде оти во базата на НАТО во Кабул се останати само оние што сѐ уште ги извршуваат своите обврски, а чија евакуација ќе се одвива согласно распоредот за повлекување од самата база.