Доколку се усвои предлогот за задолжително ПЦР тестирање во текот на утрешниот ден, туристичките агенции истакнуваат дека ќе бидат приморани да излезат на улица
Туристичките агенции го критикуваат предлогот за воведување задолжителен ПЦР тест на границите, образложувајќи дека тоа ќе значи тотален колапс на секторот.
Тие сметаат дека треба да се задржат актуелните мерки, а вакцинацијата, како што посочуваат, е неопходна за заздравување на економијата, намалување на смртните случаи и на бројот новозаразени граѓани.
Доколку се усвои предлогот за задолжително ПЦР тестирање во текот на утрешниот ден, туристичките агенции истакнуваат дека ќе бидат приморани да излезат на улица.
„Како приватен сектор кој се бори да опстане во живот, сметаме дека доколку се донесе одлука за влез во државата со задолжителен ПЦР тест ќе ги поттикне сите кои веќе уплатиле за годишен одмор да ги бараат средствата да им бидат вратени назад. Тие средства се веќе уплатени до нашите партери соработници во странство. Ова ќе значи тотален колапс, а со тоа и затворање на многу од агенциите“,
се вели во реакцијата испратена до медиумите.
Според нив, досега нема реакции од страна на патниците дека се вратиле од годишен одмор инфицирани од ковид.
„Дел од патниците се веќе вакцинирани, а останатиот дел кои патуваат надвор се со ПЦР тест или брз антиген тест што укажува на фактот дека оние што патуваат приватно и во групи се целосно безбедни. Она што се бара од надлежните институции е да се задржат актуелните мерки. Сметаме дека не е потребно да се наметне задолжително тестирање за влез во земјите во кои не е потребен тест како што се Албанија и Црна Гора. Исто така сметаме дека надлежните институции треба да спроведат детална анализа на граничните премини користејќи го моделот на ‘тестирање по случаен избор’ на македонски туристи кои се враќаат дома. По сето ова ќе може да се утврди дали е потребно задолжително тестирање. Треба да се постават мобилни екипи во меѓуграничниот појас каде граѓаните ќе може да направат брзи тестови по повластена цена кои низ лабораториите се движат од 800 до 1000 денари или да може со брз self тест да се вратат граѓаните во сопствената земја“,
велат агенциите.
Нивен став е дека за тест за излез од земјата нема никаква логика, посебно кога се патува во земји кои за влез не бараат никаков тест.