Претседателот на ДИК вели, во интервју за МИА, дека засега не може да одговори дали е можно пролонгирање на изборите, поради тоа што повторно растат бројките на заразени. „Сметам дека затоа се брза да се заврши работата, за да не се повтори ситуацијата од парламентарните избори, меѓутоа не знаемеќе се намалува или ќе се зголемува бројката“, вели Даштевски
Локалните избори, закажани за 17 октомври, ќе бидат втори по ред што ќе се одржуваат според ковид-протоколи, по ланските предвремени парламентарни избори, а во меѓувреме, под посебни услови, се реализираа и дополнителните избори за градоначалници на Штип и на Пласница, минатиот декември.
Додека земјава влегува во четвртиот бран на пандемијата на котронавирусот, во наредниот период се очекува да се интензивираат партиските активности во пресрет на изборите, додека официјалната кампања, според Роковникот на ДИК, треба да почне на 27 септември, односно во последните денови од пописот. И двете операции (пописот и изборите) беа одложени пролетта, со политички договор, а поради ситуацијата со ковид -19.
Претседателот на ДИК, Александар Даштевски, во интервју за МИА вели дека локалните избори ќе се одржат согласно протоколите за ковид-19, со исклучок на продолженото времетраење на гласањето, што беше уредено со владина уредба, за време на техничката влада минатата година.
„Продолженото време за гласање беше ад-хок уредба со законска сила од владата, така што тоа важеше само за тогаш, бидејќи во принцип важи Изборниот законик, а тој не е сменет во таа насока. Така што тие рокови нема да важат, а се друго што се однесува до другите здравствени протоколи ќе бидат апсолутно испочитувано, како и на минатите избори – маски, алкохол кој ќе го употребуваат пред да влезат во просторијата, дистанца од два метри и избирачките одбори ќе водат сметка да не влегуваат многу луѓе“,
вели Даштевски.
Претседателот на ДИК вели дека подготовките за локалните избори ќе бидат навремени, иако се уште не се донесени измените на Изборниот законик, а треба да следува и едукацијата на членовите на ОИК и на избирачките одбори, што ќе опфаќа и гласање со отпечатоци од прсти.
„Сметам дека тоа што ќе се донесе, бидејќи има работни групи професионални во Министерството за правда, и таму внимаваат што може да се направи, што не може да се направи, што е приоритетно, што не е, дека ќе внимаваат на сите работи, за да може успешно да биде спроведен процесот. Мислам ќе ги донесат само најнеопходните работи кои ќе помогнат за полесно спроведување на изборите, а дека другите работи ќе ги остават за подоцна, бидејќи е прекраток временскиот период. Во таа насока ќе се оди за да се помогне и да се олесни спроведувањето на изборниот процес, што на нас нема да ни смени многу“,
вели Даштевски во интерјуто за МИА.
Засега, тој не може да каже дали би можело да дојде до одложување на изборите, доколку бројките на заболени од ковид-19 се зголемат.
„Не можам да одговорам на тоа прашање затоа што не знаеме што ќе се случува, дали ќе се зголемува бројката, дали ќе се намалува. Јас сметам дека затоа се брза да се заврши работата, за да не се повтори ситуацијата од парламентарните избори, меѓутоа не знаеме ете дали ќе се намалува или ќе се зголемува бројката“
вели Даштевски.