Во ВМРО-ДПМНЕ деновиве се нервозни бидејќи целосно потфрлија во обидот да го скријат фактот дека токму нивниот Христијан Мицкоски направи неуспешен обид да саботира комплицирана полициска акција „Двојник“ преку јавно откривање информации во тек на активна истрага. Благодарение на брзината и координираноста на полицијата, намерата на Мицкоски да ги спаси криминалците беше осуетена, велат од СДСМ.
„Ако Мицкоски, единствениот на браникот на криминалот по сопствено признание, навистина бил загрижен за владеење на законите и државата, како што вели, сите докази за акцијата ‘Двојник’ ќе ги доставел до надлежните институции, но тој застана на страната на криминалците, јавно објавувајќи информации со цел да ја саботира акцијата на полицијата“,
пишува во соопштението од СДСМ.
Од партијата додаваат дека ваквиот потег на Христијан Мицкоски, неговото опасно загрозување на полициска истрага, како што велат, повлекува и истрага за утврдување на одговорност.
„И тоа Мицкоски го знае, затоа измислува непостоечки случаи, затоа шири измислици, во очаен обид да се испере од овој негов скандал. Граѓаните, јавноста, очекуваат одговори. Зошто шефот на ВМРО-ДПМНЕ стоел во одбрана на криминалци и има ли некакви должничко доверителски односи кон нив за да морал да саботира сложена полициска операција? На ВМРО-ДПМНЕ и на Христијан Мицкоски треба конечно да им стане јасно Владата предводена од СДСМ не прави компромиси со криминалот, оној којшто го прекршил законот мора да сноси одговорност“,
се наведува во партиското соопштение на СДСМ.