Захариева наредила во бугарското МНР повторно да биде повикан македонскиот в.д. амбасадор, затоа што Институтот од Љубљана, кој своевремено фигурираше на листата на советници на Заев, објавил, како што се посочува, низа написи со цел да го дискредитира и поткопа престижот на Бугарија
ИФИМЕС објави анализа насловена „Избори во Бугарија 2021: Бугарски ‘десант’ на Северна Македонија“, во која се наведува дека Бугарија ги извезува во С Македонија напластените внатрешни проблеми, додека идентитетските прашања се само изговор
В.д. шефот на Амбасадата на Северна Македонија во Софија ќе биде повикан во бугарското Министерството за надворешни работи, по барање на министерката Екатерина Захариева, за да објасни дали македонската Влада, како што се посочува, е поврзана со кампања за клевета против Бугарија на Институтот за балкански и блискоисточни студии (ИФИМЕС).
Министерството за надворешни работи на Бугарија, во соопштение за јавноста, изразува крајна загриженост за, како што се наведува, публикациите дека поранешни или сегашни советници на премиерот на Северна Македонија учествуваат во управувањето со предметниот институт.
Од бугарското МНР нагласуваат дека на веб-страницата на Владата на Република Северна Македонија се наведува дека словенечката организација (ИФИМЕС н.з.) има договор со извршната власт во Скопје од 2017 до 2020 година, за што добивала 1 000 евра месечно.
„Потсетуваме, организацијата Меѓународен институт за блискоисточни и балкански студии објави низа написи со јасна цел да го дискредитира и поткопа престижот на нашата земја, преку лажни, искривени и манипулативно презентирани информации“,
се наведува во соопштението на бугарското МНР.
На 15 овој месец ИФИМЕС објави анализа насловена „Избори во Бугарија 2021: Бугарски ‘десант’ на Северна Македонија“. Во анализата се наведува, меѓу другото, дека Бугарија ги извезува во С Македонија напластените внатрешни проблеми, додека идентитетските прашања се само изговор.
„Додека граѓаните на Бугарија се надеваа на поголема еднаквост и просперитет со доаѓањето на ГЕРБ, тие се здобија со многу поголеми нееднаквости во однос на социјалниот статус и приходите и уставно загарантираните права, како што се бесплатно образование, здравствена заштита и пензиско осигурување. Имаше разбивање на илузии и надежи, кои ја одржуваа нацијата заедно. Во такви околности, сегашните бугарски власти одлучуваат да ги извезат своите бројни домашни политички проблеми во соседната Северна Македонија. Историските причини и идентитетските прашања се само наведени како причини“,
се посочува во анализата на ИФИМЕС.
Кон крајот на минатата година ИФИМЕС објави анализа за бугарската блокада на интеграцискиот процес на С Македонија во ЕУ. Во текстот беше посочено дека сегашните бугарски власти сакаат да го „заверат“ идентитетот на Македонците и македонскиот јазик, така што пласираат неверодостојни податоци дека Македонците се со бугарско потекло и дека Северна Македонија мора да даде официјална изјава дека македонскиот јазик и идентитет имаат бугарски корени.
Во првиот мандат на Зоран Заев на чело на Владата, ИФИМЕС, како организација, фигурираше на листата на негови надворешни соработници. Директорите на ИФИМЕС, Зијад Беќировиќ и Алаф Бакхатирај, исто така, беа ангажиран како советници на Заев за економски прашања и за соработка на Македонија со земјите од Југоисточна Европа, но тие не ги наплаќаа своите услуги.
„ИФИМЕС е ангажиран од почетокот на мојот мандат. Не е нешто ново. Господинот Зијад Беќировиќ е платен нула денари. Пробоно е ангажиран како советник. ИФИМЕС е ангажиран за 1 000 евра месечно. ИФИМЕС е познат на регионално ниво и е доста кредибилен институт“,
изјави Заев есента 2019 година, кога беше актуелна темата за неговите советници.
Пред една недела, вршителот на должност во нашата амбасада во Софија, Владимир Крстевски, беше повикан во бугарското МНР, поради, како што беше соопштено, чести манифестации на говор на омраза и дискриминација во Република Северна Македонија од страна на службени лица против граѓани што имаат бугарски идентитет, па дури и против оние што имаат симпатии кон Бугарија и нејзиниот народ.