Пратеникот и координатор на пратеничката група на ДУИ, Изет Меџити, вели дека нема да се откаже од интерпелација против првиот вицепремиер и негов сопартиец, Артан Груби.
„Ќе продолжам во парламентот да ги поддржувам и да ги критикувам таму каде што грешат. Опцијата за интерпелација останува“,
вели Меџити за Алсат М ТВ.
Ваквата изјава на Меџити доаѓа по вчерашниот состанок на Централното претседателство на ДУИ по кој лидерот Али Ахмети порача дека се разјаснети сите разлики и дека партијата е обединета.
„Објаснети се сите разлики, не остана ништо без да се објасни до последен атом затоа што пред нас има важни обврски, доаѓаат локалните избори и пописот и сакаме да бидеме дел од придонесот“,
рече Ахмети.
Тој тврдеше и дека за оставки не се разговарало.
„Воопшто не се разговараше за оставки. Беше разговарано за принципи, стратегија, за програма, за обврските кои не очекуваат како влада. Но, се разбира треба да се даде отчет и никогаш не сум побарал да се спречи поинаквото мислење, секогаш сум бил поборник и сум охрабрувал работите да се кажуваат отворено со цел секој да ја објасни работата што ја прави. Функционерите се должни да дадат отчет пред органите на партијата бидејќи партијата е таа која ја презема одговорноста, таа бара доверба од граѓаните“,
изјави вчера Ахмети.
Изминатиов период често се зборува за превирањата во ДУИ помеѓу две страни. Од едната, струите во скопската организација на партијата каде како предводници се токму Меџити и градоначалникот на Сарај, Блерим Беџети, а од другата најистурените министри на интегративците, Артан Груби и шефот на дипломатијата, Бујар Османи.