ВМРО-ДПМНЕ реагираше по денешната прес-конференција на министерот за здравство Венко Филипче и упати критики затоа што државата сѐ уште нема добиено вакцини против ковид-19.
„Нов ден и нова лага на Филипче. Додека сите без исклучок се вакцинираат, во некои држави и избираат со каква вакцина против корона, Филипче спие. Додека сите добија веќе втора или трета тура вакцини, во Македонија нема ни една. Сега на ред во низата лаги на Филипче е дека не добиле доволно соседите кои му ветиле вакцини па затоа не ни дале?! Што прави Филипче освен што секој ден смислува и кажува лаги. Очигледно само за своите и интересите на Заев се грижи.Неспособноста на Филипче и Заев, нивната зафатеност со корупција и криминал граѓаните ги чини живот. Тие ја направија Македонија црна дупка. За скоро една година од првиот случај во Македонија не направија ништо. За тоа мора да се одговара“,
се вели во партиското соопштение.
На забелешката дека системот Ковакс не функционира и дека земјите што треба да добијат вакцини преку него сѐ уште немаат ниту една доза, на денешната прес-конференција со министерот Филипче, шефицата на канцеларијата на СЗО во земјава, Џихан Тавила, рече дека не знае врз основа на што се излекуваат вакви заклучоци, но знае дека вакцините ќе пристигнат во скоро време.
Министерот за здравство Венко Филипче рече дека веќе се резервирани дозите за земјава од „Фајзер“ и се очекува првите количини да пристигнат идниот месец.
Истовремено, во изминатите неколку дена има информација од системот Ковакс дека и тие вакцини ќе стигнат во февруари, а во меѓувреме е можно некои од земјите со кои Владата разговараше како Австрија, Бугарија, Полска и Грција да одделат некоја количина од своите.
Како причина зошто тоа досега не профункционирал тој систем на европска солидарност, Филипче рече дека е малата количина што и тие самите ја добиле – некаде една десеттина од планираната поради капацитетот на производство.
Со зголемувањето на производството на „Фајзер“, но и производството на другите компании што се дел од системот Ковкас, тој дека смета по февруари дистрибуцијата на вакцини ќе биде со поголема динамика.