Лидерот на ВМРО-ДПМНЕ бара одговорност од вицепремиерот за европски прашања обвинувајќи дека тој со Заев не ги исполниле ветувањата за европска иднина
Интерпелација за вицепремиерот за европски прашања Никола Димитров најави денеска претседателот на ВМРО-ДПМНЕ, Христијан Мицкоски, посочувајќи дека опозицијата планира повеќе чекори кои, како што рече, ќе водат кон рушење на Владата, за која оцени дека нема легитимитет.
Првиот чекор што го најави Мицкоски е ВМРО-ДПМНЕ во Собранието да поднесе интерпелација за Димитров, кој е вицепремиер од редовите на СДСМ и пред нешто повеќе од сто дена, практично, ја смени функцијата со актуелниот шеф на дипломатијата Бујар Османи од ДУИ.
„Заев и Димитров се тандемот кој ветуваше европска иднина. Распродадоа сѐ што можеше да се распродаде во овие четири години од гордоста и сега тргуваат со она малку што остана. Всушност, гледаме дека не доведоа до ќор-сокак. За ова мора да се понесе одговорност“,
изјави Мицкоски.
Пред денешната најава дека Димитров ќе биде првиот член на извршната власт кој ќе се соочи со интерпелација, Мицкоски најавуваше дека ВМРО-ДПМНЕ ќе поднесе во парламентот гласање за доверба на Владата.
Интерпелацијата за Димитров Мицкоски ја најави на денешната прес-конференција, додека премиерот Заев и вицепремиерите, на прес-конференција на „Илинденска“ даваа отчет за сработеното во првите сто дена.
На прес-конференцијата во Владата, Димитров рече дека за среда е закажан состанок на амбасадорите во Брисел (КОРЕПЕР), на чиј дневен ред ќе биде и прашањето за С Македонија. Сепак, тој истакна дека не би сакал да дава големи надежи околу исходот.
Во минатиот собраниски состав, ВМРО-ДПМНЕ двапати поднесуваше интерпелација за Димитров додека тој беше министер за надворешни работи, прво по постигнувањето на договорот со Бугарија, а потоа и со Грција.
Според собранискиот Деловник, интерпелација може да постават најмалку пет пратеници за работата на носител на јавна функција, Владата и секој нејзин член поединечно, како и за прашања од работата на државните органи. Функционерот на кој му е поднесена интерпелација има право да достави писмен одговор до претседателот на Собранието, најдоцна во рок од 15 дена од денот на приемот на интерпелацијата.
Интерпелацијата се става на дневен ред на првата наредна седница на Собранието, по истекот на 15 дена од денот на доставувањето на одговорот до пратениците. Ако одговорот не се поднесе во рокот утврден во членот 46 на овој Деловник, интерпелацијата се става на дневен ред на првата наредна седница на Собранието. Претресот по интерпелацијата трае еден работен ден – до исцрпувањето на листата на пријавените пратеници за збор, а се одлучува најдоцна до полноќ.