„Млатење празна слама“, го нарече лидерот на ВМРО-ДПМНЕ денешниот отчет на премиерот
Поминаа 100 дена на загубена иднина, на загубени економија, правда, вистина, животи, достоинство и на атакуван идентитет. Вака лидерот на СДСМ го оцени „грејс-периодот“ на новата влада на СДСМ и на ДУИ, на прес-конференција што ја одржа додека на „Илинденска“ бр. 2 траеше отчетот на премиерот Зоран Заев со вицепремиерите.
Мицкоски рече дека тема на оваа прес-конференција не се првите 100 дена на Владата, од чие формирање, всушност, поминале 107 дена, туку „слепата улица и блокадата која нашата држава ја има од источниот сосед“.
Сепак, Мицкоски, главно, говореше за севкупната работа на Владата, оценувајќи го притоа отчетот на Заев како „млатење празна слама“.
Според Мицкоски, изминатите 100 дена на Владата се вистинско фијаско и продолжение на низата која, како што рече, трае четири долги години, исполнети со промашувања, криминал и неуспеси. Тој рече дека гледа оти на Владата ѝ пречи што опозицијата критикува во првите сто дена, ама, како што нагласи, ова не е нова Влада и од граѓаните зависи уште колку време ќе владее.
„Денес видовме прес-конференција која треба да влезе во учебниците за тоа како изгледаат лажните вести. Или, народски да се изјаснам, ‘млатење празна слама’. Ова се најлошите 100 дена на кој било влада во македонската современа држава“,
нагласи опозицискиот лидер.
Според Мицкоски, сегашната влада не може да ги менаџира ниту економијата, ниту образованието, ниту надворешната политика. Како што оценува, нема ниту еден капитален проект, гасификацијата доцни, а повеќето граѓани живеат со по две евра на ден.
„Ова се 100 дена на загубени штедни влогови, упропастена банка, загубени пари, илјадници загубени работни места, загуби за земјоделците, бизнисот, загубени инвестиции. Ветуваа живот, а по изборниот инженеринг составија Влада со ветување – можеме повеќе и подобро. За само 100 дена добивме вето на патот кон ЕУ и влеговме во рецесија, поскапе струјата, се загубија животи поради неспособност да се манаџира здравството. И не само тоа, туку и многу лажат, тоа е за нив секојдневие. Нормална држава овие работи не би издржала“,
оцени лидерот на ВМРО-ДПМНЕ