За причините за порастот на смртноста, Филипче рече дека тоа допрва треба да се истражи, бидејќи непознато е зошто болеста кај некои минува речиси без симптоми, а за некои е фатална
Министерот за здравство Венко Филипче денеска изјави дека врз основа на анализите на бројките и трендовите може да се забележи дека епидемијата на ковид-19 го достигна врвот пред една недела, и оттогаш бројките се стабилизираат, се на ниво на плато, односно R0 факторот на преносливост е 1.
На денешната прес-конференција тој презентира бројка за изминатите три недели, според кои бројот на заразените се движи помеѓу 7 400 и 7 500 на неделно ниво, односно по период од две до 4 недели на нагло растење, тие се стабилизираат. Процентот на заразени од бројот на тестирани е меѓу 36 и 41 отсто, со тоа што како ден кога е достигнат црн рекорд е 17 ноември – со досега најголема бројка на новозаразени во еден ден од 1 407 лица и процент од 41,2 отсто.
Охрабрува и бројот на оздравени, кој расте во континуитет, но загрижувачки е бројот на смртни случаи кој, пак, покажува тренд на пораст.
За причините за порастот на смртноста, Филипче рече дека тоа допрва треба да се истражи бидејќи непознато е зошто болеста кај некои минува речиси без симптоми, а за некои е фатална. Просекот на хоспитализирани во изминатиот период е 1 280 или вкупно е 6,7 отсто од заразените.
Нема потреба од нови мерки
Министерот за здравство рече дека засега не се планираат дополнителни рестриктивни мерки бидејќи актуелните даваат резултати.
„Забраната за движење после 21 часот ништо нема да донесе, бидејќи е празно, угостителските објекти се затворени, групирањето е забрането, освен домашните собирања кои се ризик и има препораки да не се организираат. Затоа голем дел од ефективноста на мерките зависи од одговорноста на граѓаните“,
рече Филипче.
Тој апелираше граѓаните да разберат дека во оваа состојба вирусот сигурно ќе опстане бидејќи е многу широко распространет, но смета дека позитивно е што го нема веќе оној пораст на број на пациенти, ниту огромниот притисок кон болниците како што беше пред неколку недели.
„Тој притисок сѐ уште постои, но не со таков интензитет“,
вели министерот за здравство.
Како позитивни ги оцени и вестите што доаѓаат во однос на вакцините, кои се во завршни фази и земјава очекува преку системот Ковакс да ги добиеме и ние кога ќе бидат на располагање.
„Тоа е одлична вест, која следната година веројатно ќе ја смени целокупната слика за пандемијата во светот и во таа насока ќе може да очекуваме и стабилизација“,
рече Филипче.