Посетата на шефот на дипломатијата на земјите од регионот се случува во пресрет на важните одлуки за европската перспектива на земјата, во очекување на усвојување на преговарачката рамка и одржувањето на првата Меѓувладина конференција со ЕУ
Министерот за надворешни работи Бујар Османи денеска патува во официјална посета на Љубљана, а во вторник продолжува во работна посета на Република Хрватска.
Османи утре ќе оствари средба со министерот за надворешни работи на Словенија Анже Логар. Во рамки на оваа посета се предвидени и средби со претседателот на државата Борут Пахор, како и со претседателот на словенечкиот парламент Игор Зорчич.
Од Љубљана во вторник Османи директно патува во работна посета на Република Хрватска, каде покрај средбата со хрватскиот министер за надворешни работи Горан Грлиќ – Радман, ќе се сретне и со премиерот Андреј Пленковиќ.
Како што соопшти МНР, посетата на шефот на дипломатијата на земјите од регионот се случува во пресрет на важните одлуки за европската перспектива на земјата, во очекување на усвојување на преговарачката рамка и одржувањето на првата Меѓувладина конференција со Европската Унија.
Фокус на средбите се очекува да биде токму европската интеграција на Република Северна Македонија, постигнатиот реформски напредок и одржувањето на добрососедските односи, реафирмирајќи ги притоа очекувањата за поддршка од страна на нашите пријатели за почеток на преговорите во рамките на германското претседателство со ЕУ – до крајот на годината.
На средбите, најавуваат од МНР, се очекува да се разговара и за предизвиците со пандемијата од ковид-19.