Министерот порача дека рестрикции и мерки ќе се носат секогаш кога ќе се процени дека тоа е единствен начин да се заштити системот и јавното здравје
Со денешната повторна висока бројка на новозаболени, станува јасно дека влегуваме во очекуваниот есенски бран. Иако, многумина не веруваа во најавите дека тој ќе се случи, сепак се докажува дека очекувањата беа реални. Цела Европа во моментов се соочува со нова криза и во повеќе земји има силни рестрикции и нови мерки, посочува министерот за здравство Венко Филипче на својот профил на Фејсбук.
Апелирајќи да се почитуваат мерките за заштита, Филипче потенцира дека не смее да се преоптовари здравствениот систем и дека рестрикции и мерки ќе се носат секогаш кога ќе се процени дека тоа единствениот начин да се заштити системот и јавното здравје.
„Разбирам дека кај сите има голем замор од оваа состојба и дека буквално ви е преку глава од коронавирусот. Но, верувајте дека заморот е уште поголем кај здравствените работници. Тие седум месеци деноноќно работат да ја одржат состојбата под контрола. Целиот менаџмент и Комисијата за заразни болести даде сѐ од себе изминатиот период да подготви протоколи, да го реорганизира системот и да го дочекаме подготвени есенскиот период. Како министер нема да дозволам да се преоптовари здравствениот систем и да нема кревети за лечење. Нема да дозволам да клекнат на колена колегите од замор. Рестрикции и мерки ќе носиме секогаш кога ќе процениме дека тоа е единствен начин да се заштити системот и јавното здравје. Тоа е наша одговорност и должност“,
вели Филипче.
Филипче вели дека очекува да се казнува секој што не ги почитува мерките, особено откако и инспекторатите добија поголеми надлежности, со кои ќе можат на лице место да затвораат локали.
„Го разбирам целосно гневот на оние кои доследно ги почитуваат постоечките мерки кои се на сила од почетокот и со нив ефикасно се штитат. За многумина препораките за одржување дистанца, носење маска и редовна дезинфекција се доволни мерки. Во оваа прилика сакам да им изразам голема благодарност и да им честитам на свесноста и совесноста. За жал, новите мерки кои ги носиме мора да се однесуваат за сите и едноставно не може парцијално да се применуваат само онаму каде има непочитување на основните три. Како Влада силно се заложуваме за спроведување на мерките и казнување на оние кои не ги почитуваат. Од денес веќе и инспекциите имаат поголеми надлежности и тие максимално посветено ја работат својата работа. Верувам дека надлежните ќе направат сѐ да ги санкционираат неодговорните граѓани“,
посочи Филипче.
Сепак министерот вели дека ниту инспекторите, ниту полицијата, ниту здравствените работници не може да се справат со несовесноста на некои граѓани и компании.
Затоа, уште еднаш апелира граѓаните да се обединат за заедно да се надмине следниот период преку почитување на мерките без исклучок.