На утрешната владина седница ќе се одлучува за предложените измени на Законот за заштита на населението од заразни болести, со кои се предвидуваат поголеми овластувања на инспекциските служби за справување со прекршителите на ковид-протоколите.
Новите поголеми овластувања е предвидено да важат за сите инспекциски служби на национално и на локално ниво.
Денеска вицепремиерот Љупчо Николовски, заедно со министрите за внатрешни работи и здравство, Оливер Спасовски и Венко Филипче, одржал средба со претседателката на Инспекцискиот совет Магдалена Филиповска-Грашкоска, како и со директорите на инспекциските служби.
На состанокот се разговарало за спроведените инспекциски контроли во текот на изминатиот викенд, како и предлозите за зголемување на надлежностите на инспекторатите.
Инаку, од почетокот на месецот до денеска, Државниот пазарен инспекторат изврши 160 контроли во целата држава, од кои најмногу во Битола (37), Гостивар (30), Скопје (28) и во други градови. Притоа, поднесени се 18 кривични пријави, издадени се 8 решенија за пречекорување на работно време и изречени се 22 глоби.