Обвинителката во изјава за медиумите рече Обвинителството презентирало материјални докази и сведоци дека ВМРО-ДПМНЕ ги организирало протестите, но им верува на сведоците дека нема формална партиска одлука бидејќи како и за други важни прашања, не оставаат документи зад себе
Поранешната министерка за внатрешни работи Гордана Јанкулоска, ексминистерот за здравство Никола Тодоров и бившата пратеничка и претседателка на Унијата на жени на ВМРО-ДПМНЕ Даниела Рангелова се меѓу денешните 17 сведоци кои денеска во судница зборуваа за протестите на движењето „За заедничка Македонија“ и за настаните во Собранието на 27 април 2017.
Тие сведочеа по предлог на поранешните функционери обвинети за настаните од „крвавиот четврток“, а сведочењата, како и претходните членови на ВМРО-ДПМНЕ, беа во насока дека партијата не ги организирала протестите.
Јанкулоска сведочеше дека не ѝ се познати партиски одлуки во врска со протестите и оти ВМРО-ДПМНЕ никогаш не излегла со формален став за демонстрациите.
„Одлука на Извршниот комитет (ИК) за поддршка на протестите не беше донесена“,
рече Јанкулоска која во тој период беше дел од ИК.
Рангелова, исто така, посочи дека до неа не стигнало барање за да се организира членството.
Ексминистерот Никола Тодоров, пак, оцени дека овие настани не и требале ниту на партијата ниту на државата и според него, СДСМ имала физички жртви, додека ВМРО-ДПМНЕ политички односно изгубила гласови.
Тодоров откри и дека тогаш имало разговори за широка коалиција.
„Бевме на добар пат за таа широка коалиција, која требаше да ја стави државата на патот за членство кон ЕУ и НАТО“,
рече Тодоров.
Обвинителката Вилма Русковска, пак, во изјава за медиумите рече Обвинителството презентирало материјални докази и сведоци дека ВМРО-ДПМНЕ ги организирало протестите, но им верува на сведоците дека нема формална партиска одлука.
„Верувам дека во еден дел се точни изјавите на сведоците дека нигде нема официјален документ дека таа партија ги организира протестите. Тие за ниедно важно прашање тие зад себе не оставаат официјален документ и во тој дел им верувам на сведоците“,
рече Русковска.
На минатото рочиште, пак, сведочеше актуелниот лидер на партијата, Христијан Мицкоски, кој во тој период беше генерален секретар. И тој негираше дека ВМРО-ДПМНЕ стои зад протестите и рече оти народот се самоорганизирал.
„Протестите беа организирано изразување незадоволство од страна на народот, од граѓани кои сами се организираа во тој период, на тие протести присуствував и јас, одев речиси секој ден и тоа беше реакција на тогашната политичка ситуација. Што се однесува до партијата, нормално разговаравме и дебатиравме, но ако прашањето е дали партијата ги организираше тие протести, мојот одговор е не“,
рече Мицкоски во сведочењето на 25 декември 2020.
За организацијата на „27 април“, Обвинителството за гонење организиран криминал и корупција ги обвини поранешниот претседател на Собранието, Трајко Вељаноски, ексминистрите Спиро Ристовски и Миле Јанакиески, и бившиот директор на тогашната УБК, Владимир Атанасовски. Сите се товарат за делото терористичко загрозување на уставниот поредок и безбедноста.
Во истрагата беа обвинети и експремиерот Никола Груевски и поранешниот разузнавач Никола Бошковски, но тие не се најдоа во обвинението бидејќи во тој момент беа недостапни за органите на прогонот (едниот избега во Унгарија, другиот во Грција) и истрагата за нив остана отворена.