Една причина, најверојатно, е намерата да се избегнат незгодни новинарски прашања во деликатен момент од преговорите меѓу Бугарија и Северна Македонија, а друга – лошото искуство со последната посета на Жозеп Борел и неговата изјава дека не може да вети датум, туку само добра волја за што побрз старт на преговорите, која предизвика бура од негативни реакции
Околу 35 минути еврокомесарот за соседство и проширување, Оливер Вархеји, денеска стоеше пред новинарите во Тирана на заедничка прес-конференција со албанскиот премиер, Еди Рама, и одговараше на прашања за евроинтеграцискиот процес и формалниот почетокот на преговорите на Албанија со ЕУ.
Оттаму тој порача дека целта е и Албанија и Северна Македонија да ги почнат преговорите за време на француското претседателство со ЕУ, кое завршува на 30 јуни годинава.
Вархеји во Тирана отпатува откако вчера беше во Скопје, а ден претходно и во Софија. Во Бугарија тој учествуваше на Регионалниот форум за односите меѓу Европската Унија и Балканот – „ЕУ се среќава со Западен Балкан“ (EU meets Balkans), а и таму и кај нас имаше средби со државниот и политичкиот врв.
„Сега е моментот за деблокада на евроинтеграциите“, „Немаме време за губење“, беше наративот кој преовладуваше во обраќањето на еврокомесарот на софискиот форум, но и во соопштенијата по средбите во Скопје.
- Вархеји: Му благодарам на Петков за отворената дискусија која ќе не однесе до првата меѓувладина конференција за С Македонија и Албанија
- (ВИДЕО) Ковачевски – Вархеји: Сега е моментот за деблокада на евроинтеграциите на С Македонија
- Османи на средба со Вархеји: Регионот е уморен од чекање, страда кредибилитетот на Унијата
- Мицкоски се сретна со Вархеји: Преговорите со ЕУ треба да започнат веднаш, без дополнителни условувања од било која страна
Меѓутоа, Вархеји не одржа прес-конференција на која ќе одговара на прашањата, како на македонските, така и на бугарските новинари, како при неговата денешна посета на Албанија, земја која е во ист пакет со Северна Македонија кога е во прашање отворањето на пристапните преговори со ЕУ.
Една од причините зошто Вархеји немаше соочување со новинарите, најверојатно, е намерата да ги избегне незгодните прашања во деликатен момент од преговорите меѓу Софија и Скопје.
Друга причина, најверојатно, е лошото искуство со последната посета на Скопје на високиот претставник на ЕУ за надворешна политика и безбедност, Жозеп Борел. На заедничка прес-конференција со премиерот Димитар Ковачевски на 14 март годинава, до Борел, логично, беа упатени прашања за тоа дали до јуни ќе се случи деблокада на евроинтеграциите на С Македонија.
„Не можам да ветам, но можам да ве уверам дека правиме сè што можеме тоа да биде што побрзо. Се надевам дека дотогаш ќе се разрешат билатералните прашања, кои веќе не смеат да го загрозуваат овој процес, за која и земја кандидат да станува збор. Постојано проценуваме дека земјата е подготвена да почнеме преговори и тоа не е чиста реторика, туку изјави за намера“,
рече Борел.
Овој одговор предизвика критички реакции од многумина во земјава и ја наметна дилемата – дали Борел воопшто требаше да дојде ако немал што да донесе како конкретна порака.
Избегнување сличен ефект може да е една од причините за Вархеји да не одржи прес во Скопје (и Софија).
А дека преговорите се во деликатна фаза може да се насети од неколку последни јавни настапи на бугарскиот премиер Кирил Петков, во кои како да се обидуваше да подготви терен за тргање на ветото, под одреди услови. За својата намера, Петков се уште се бори за согласност од своите коалициски партнери – Има таков народ и Бугарската социјалистичка партија.
Во едно од интервјуата Петков кажа дека размислувањето дали да се укине ветото или не, е погрешен начин зошто Северна Македонија би влегла во Унијата за 10 години што е доволно време двете земји да преговараат, а Бугарија во целиот процес може да ги постави своите услови низ преговорите.
„Гаранцијата за правата на Бугарите во Република Северна Македонија може да се обезбеди и преку европскиот процес. Впрочем, ако ги ставиме во европскиот договор на Република Северна Македонија, веќе нема само Бугарија да ги брани овие права, туку договорот со Европската унија ќе го гарантира ова право. Значи, укинувањето на ветото, како што сите велат – дали да се укине или не, е погрешен начин на размислување. Тука мора да кажеме – Северна Македонија ќе биде во Европската унија најрано после 10 години. Има многу поглавја на нејзиниот пат кон Европа. Ние едноставно треба да ги поставиме нашите услови – на пример, за Уставот пред отворањето на првото поглавје. На овој начин, со укинувањето на ветото, ние на Северна Македонија ѝ даваме пат да тргне. Но, во овие посебни поглавја можеме да ги ставиме сите услови кои ни се неопходни, и така нема да го решиме проблемот што моментално постои за една или две недели, туку ќе имаме 10 години да работиме заедно за да може Северна Македонија навистина да биде европска држава и сите права на Бугарите таму да бидат целосно заштитени. Значи, пристапот треба да биде попаметен“,
рече Петков во неговото интервју за БТВ.