Еврокомесарот го поздрави трпението на Албанија и побара истото да потрае. Албанскиот премиер Еди Рама, пак, уште еднаш порача дека во моментов нема да бараат одвојување од Северна Македонија, но доколку преговорите не почнат до јуни тогаш Тирана ќе бара одвојување
Еврокомесарот за проширување Оливер Вархеји на заедничката прес-конференција со албанскиот премиер Еди Рама, во Тирана, изјави дека е потребно воспоставување стабилност во Западен Балкан а преговорите со Албанија и Северна Македонија да почнат за време на француското претседавање кое завршува на 30 јуни годинава.
„Несомнено, треба да употребиме сè што имаме во рака. Не може да има војна во Европа, а Европа да не ја употреби сопствената моќ да го стабилизира Западен Балкан. Вистина е дека во овој процес ние гледаме да воспоставуваме долгорочна стабилност на Балканот. Не можам да дадам време за оние кои чекаат во овој процес за интеграција. Ние треба да донесеме одлука и да одиме напред во работата. Цел е оваа работа да заврши за време на француското претседавање. Мора да почнеме со вистинска интеграција на терен“,
изјави Вархеји.
Тој го поздрави, како што рече трпението на Албанија, барајќи истото да потрае.
Рама, пак, уште еднаш порача дека ако до јуни не почнат преговорите ќе бараат одвојување на Албанија и Северна Македонија.
„Во моментов не се одвојуваме од Северна Македонија, но доколку не почнат преговорите во јуни ќе побараме одвојување“,
рече премиерот на Албанија.
Вархеји во Тирана замина по вчерашната посета на Скопје, а претходно беше и во Софија.
*Поврзани вести:
(ВИДЕО) Ковачевски – Вархеји: Сега е моментот за деблокада на евроинтеграциите на С Македонија
Османи на средба со Вархеји: Регионот е уморен од чекање, страда кредибилитетот на Унијата