Решението за кое зборува бугарскиот премиер е Северна Македонија да преземе обврска, во текот на пристапниот процес со ЕУ, да ги внесе Бугарите во Уставот и тоа пред отворањето на првиот преговарачки кластер (околу две години по одржувањето на првата меѓувладина конференција)
Бугарија во 2020 година гласаше за Северна Македонија да биде пуштена кон ЕУ, а веднаш потоа ја блокираше, што ја прави редок пример во Унијата, вели бугарскиот премиер
Во интервју за бугарската телевизија „Нова“, премиерот Кирил Петков вели дека сам нема да преземе ништо во однос на Северна Македонија, како што го обвинуваат. За ова прашање, вели тој, потребно е гласање во бугарскиот парламент и широка дебата. Петков потсетува и дека Бугарија во 2020 година гласала на Европскиот совет за Северна Македонија да биде пуштена во насока на ЕУ, за потоа да ја блокира.
„На Северна Македонија и го даваме патот кон Европа, но овој пат е поплочен со барања и обврски, јасно врамен и на тој начин ја користиме цела Европа за да го обезбедиме напредокот што го сакаме како Бугари. Ако сакаме сега да го смениме Уставот, тоа е многу тешко. Но, првото поглавје не може да се отвори без да се смени Уставот, потоа веќе ќе мора да го менуваат Уставот, не затоа што Бугарија сака, туку затоа што тоа е нивниот договор со ЕУ, кој го дефинира патот на С Македонија како земја членка“,
рече Петков.
Во интервјуто, Петков вели дека Бугарија треба да го помести ветото за македонските евроинтеграции, а не да го подигне. Според него, бугарските барања треба да бидат вклучени во преговорите за членство на Северна Македонија со ЕУ и Европа да гарантира дека ќе бидат исполнети.
„Доколку правата на Бугарите со промената на Уставот се гарантирани од ЕУ, со други зборови, промената треба да биде дел од пакетот мерки вклучени во договорот за Република Северна Македонија и нивна должност е да го сменат Уставот на патот кон Европа – тоа е еден чекор напред“,
рече бугарскиот премиер.
Тој вели дека не треба да се чека некој друг да ја заврши работата, туку дека тоа тие треба да го побараат да стане дел од процесот.
„Најглупавото нешто што можеме сега да го направиме е против бугарскиот интерес и ќе се сопнеме – да бараме сè што сме сакале да се случи, да се случи пред подигнување на ветото. Тогаш националистите ќе ја преземат власта таму и тогаш шансите ни се нула. Сега имаме нормална влада таму и тaa е подготвенa да ги преземе ангажманите со европски договор“,
вели Петков.