Опозициската партија утре ќе добие нов генерален секретар, по енигматичната оставка на Игор Јанушев од оваа функција – наброзо по изборот на новата Влада на СДСМ, на која тој и се закануваше со „политички пекол“
ВМРО-ДПМНЕ утре ќе го избере новиот генерален секретар, најави вечерва на Телма, партискиот лидер Христијан Мицкоски, десетина дена по оставката на неговиот до скоро најблизок соработник Игор Јанушев.
Вистинските причини за оставката што Јанушев ја поднесе на последната седница на Централниот комитет на ВМРО-ДПМНЕ, набрзо по изборот на новата Влада, останаа енигма за јавноста. За разлика од Владо Мисајловски и Александар Николоски на кои вечерта на 21 септември им беше потврден потпретседателскиот мандат во ВМРО-ДПМНЕ, Јанушев не само што поднесе оставка „од лични причини“, туку и не се најде меѓу членовите на новиот состав на ИК.
Од друга страна, на истата седница на ЦК, Мицкоски, на некој начин, си ја забетонира позицијата на чело на ВМРО-ДПМНЕ, наспроти барањата за негова оставка, со тоа што предложи одржување вонреден конгрес, но сопартијците го одбија неговиот предлог.
Јанушев беше именуван за генерален секретар на партијата набрзо по изборот на Мицкоски на чело на ВМРО-ДПМНЕ. Од таа позиција тој го предводеше и централниот изборен штаб на партијата на неодамнешните претседателски избори, како и на ланските претседателски избори.
Во изминатите три години тој беше меѓу најгласните и најекспонирани критичари на владата на СДСМ. На изборите на 15 јули, пак, беше носител на листата на ВМРО-ДПМНЕ во третата ИЕ – единствената од вкупно шест, каде што опозицијата постигна подобар резултат од СДСМ. Со тоа Јанушев си го обезбеди првиот мандат како пратеник, а на собраниската седница за избор на Владата им се закани на СДСМ и на ДУИ со политички пекол.
Во предизборието, пак, беа објавени неколку снимки од разговори на Јанушев, главно со поранешниот министер за транспорт и врски Миле Јанакиески, со кого договарале разни „трикови“ за привлекување повеќе гласачи на избори.