Во контекст на изјавата на лидерот на СДСМ кон новинар од ТВ Алфа, новинарските здруженија посочуваат дека доколку кој било чинител во општеството има сомнеж за незаконитости и пропусти во работењето на одредени медиуми, треба да ги адресира пред институциите, а не преку јавни политички кампањи против конкретни новинари и медиуми
Недозволиво и непримерно е претседател на политичка партија јавно да упатува тешки обвинувања за корупција проследени со дискредитирачка реторика кон новинари и медиуми.
Ваква е реакцијата на Здружението на новинари на Македонија (ЗНМ) и Самостојниот синдикат на новинари и медиумски работиници (ССНМ) во врска со изјавата што лидерот на СДСМ, Венко Филипче, ја упати кон новинар од телевизија Алфа за време на денешната прес-конференција. Одговарајќи на новинарски прашања, Филипче рече дека одредени медиуми, меѓу кои и ТВ Алфа, се во паника по промената на власта во Унгарија и најавите на новата власт за испитување на бизнис-релациите на Виктор Орбан во регионот.
Во контекст на изјавата на Филипче, ЗНМ и ССНМ реагираат дека политичарите не смеат да ги користат медиумите како средство на партиско-политичка пресметка. Посочуваат дека доколку кој било чинител во општеството има сомнежи за незаконитости и пропусти во работењето на одредени медиуми, тие треба да ги адресира пред надлежните институции, а не преку јавни политички кампањи против конкретни новинари и медиуми.
„Во спротивно, политичките чинители ја намалуваат довербата кон медиумите преку ваквите постапки, а тоа не е во духот на вредностите за кои треба да се залагаат. Ги повикуваме сите политички партии во иднина да се воздржат од јавни изјави што можат да поттикнат притисок, дискредитација или недоверба кон новинарите и медиумските работници. Префрлањето вина кон новинари и редакции, како и нивно јавно етикетирање, не е демократски однос кон слободата на изразување и улогата на медиумите во општеството“,
се додава во реакцијата на ЗНМ и ССНМ.
Според новинарските здруженија, не се работи за изолиран случај, туку за загрижувачка пракса со која политичките субјекти сè почесто се обидуваат да поттикнат наративи за оцрнување на поединечни новинари и редакции. Во овој контекст, посочуваат дека политичарите и функционерите треба да покажат повисоко ниво на толеранција кон медиумското известување и да не користат понижувачки јазик кон новинарите.