Осомничениот, како што велат од Обвинителството, се јавува како извршител на други кривични дела од областа на насилниот криминал – насилство, лихварство и поголем број прекршоци за нарушување на јавниот ред и мир
Основното јавно обвинителство Куманово поведе постапка против 39-годишен жител на кумановското село Черкези поради сомнение дека го навредувал и му се заканувал на претседателот на Владата. Заканите, како што информираат од Обвинителството, осомничениот ги упатувал во пораки преку социјалните мрежи.
Јавниот обвинител до судија на претходна постапка доставил предлог за определување мерка притвор за осомничениот поради ризикот од бегство, а особено фактот што тој се јавува како извршител на други кривични дела од областа на насилниот криминал – насилство, лихварство и поголем број прекршоци за нарушување на јавниот ред и мир.
Од Обвинителството велат дека, согласно обезбедените докази во однос на претходното поведение на осомничениот, станува збор за конфликтна личност која влегува во постојани расправии, закани и физички пресметки со пријавители, па се оценува дека постои реален ризик ваквите агресивни испади да прераснат во потешки кривични дела со животозагрозувачки последици со кои се заканува.