Во вакви моменти најважно е да се покаже навремена емпатија и солидарност. Бугарија е подготвена да прифати уште жртви, изјавил денеска бугарскиот премиер
Од земјите во соседството, ден на национална жалост поради трагедијата што ја потресе земјава денеска е прогласен во Црна Гора, а утре знамињата на половина копје ќе бидат и во Србија
Во Бугарија утре (18 март) ќе биде прогласен за ден на национална жалост во знак на солидарност со земјава по трагедијата во ноќниот клуб во Кочани во кој животите ги загубија 59 лица, а над 100 се повредени.
Ова денеска го соопшти бугарскиот премиер, Росен Жељазков, кој, како што пренесе БГНЕС, рекол дека ваквиот гест е знак на солидарност со најблискито сосед на Бугарија на Балканот.
Тој изразил сочувство до семејствата на жртвите на жртвите во пожарот, потсетувајќи дека 14 од критично повредените се пренесени на лекување во медицинските установи во Бугарија.
„Во вакви моменти најважно е да се покаже навремена емпатија и солидарност. Бугарија е подготвена да прифати уште жртви… Обезбедивме услови и роднините на жртвите да пристигнат овде и да бидат во контакт со нивните родини“,
вели Жељазков.
Денеска, како што е најавено, Владата на Република Србија денешната седница, на предлог на претседателот на државата, Александар Вучиќ, исто така ќе го прогласи вторник 18 март 2025 година за ден на жалост во Република Србија поради трагедијата во земјава.
„Премиерот на Република Србија, Милош Вучевиќ, и претседателот Вучиќ утринава разговараа за трагедијата во Кочани во Република Северна Македонија, каде што голем број граѓани загинаа во пожар во дискотека, по што беше одлучено е 18 март да биде ден на жалост во Република Србија“,
се наведува во соопштението на српската влада.
По повод трагедијата во Северна Македонија, во која загинаа 59 лица, а над 150 се повредени, понеделник, 17 март, во Црна Гора е прогласен за Ден на жалост.
Поради трагедијата во Кочани национален ден на жалост денеска е прогласен во Црна Гора.
„Владата на Црна Гора е подготвена да застане покрај пријателскиот народ на Северна Македонија на сите неопходни начини во ова тешко време и со ова ја информира јавноста дека понеделник, 17 март, во Црна Гора ќе биде Ден на жалост. Изразуваме длабоко сочувство до семејствата на жртвите, а на повредените им посакуваме брзо закрепнување. Нашите мисли и молитви се со Северна Македонија“,
напиша црногорскиот премиер Милојко Спајиќ на Икс.
Во Македонија денеска е прв ден од седумдневната жалост во спомен на жртвите од трагедијата во Кочани.
Седумдневната жалост е прогласена на територијата на целата држава и од денеска националното знаме се вее на половина копје.
Сите планирани настани во установите од областа на културата во текот на оваа недела се откажуваат, информира Министерството за култура и туризам.
Агенцијата за аудио и аудиовизуелни медиумски услуги (АВМУ) вчера преку соопштение им укажа на медиумите дека треба да го усогласат своето работење со деновите на жалост.