Америка и Франција се подготвени на Украина да ѝ испратат оклопни борбени возила, но не и тенкови што украинскиот претседател веќе извесно време ги бара од западните сојузници
Западните сојузници се подготвени да ѝ испратат на Украина борбени оклопни возила, но не и тенкови што таа ги бара за борба против руските сили, пишува Ројтерс.
Францускиот претседател Емануел Макрон го известил својот украински колега Володимир Зеленски дека неговата влада ќе испрати лесни борбени борбени возила „еј-ем-икс-10 рц“ за да ѝ помогне на Украина во нејзините воени напори, изјави француски официјален претставник по телефонскиот разговор меѓу двајцата шефови на држави.
Иако официјалниот претставник рече дека ова ќе бидат првите западни оклопни возила испорачани на Украина, Австралија во октомври соопшти дека на Киев му испорачала 90 возила од типот „бушмастер“ – оклопна единица која е зајакната против нагазни мини, оган од мало оружје и други закани.
Во вечерното видео обраќање, Зеленски му се заблагодари на Макрон за објавата и рече дека тоа ја покажува потребата другите сојузници да обезбедат потешко оружје.
И покрај благодарноста до западните сојузници, украинскиот претседател инсистира војската на неговата земја да биде снабдена со тенкови.
„Ова е нешто што испраќа јасен сигнал до сите наши партнери. Не постои рационална причина зошто Украина сè уште не е снабдена со западни тенкови“,
рече Зеленски.
Американскиот претседател Џо Бајден доцна вчера изјави дека Вашингтон размислува да испрати борбени возила од типот „бредли“ во Украина, пренесува Гардијан.
Оклопното возило „бредли“, кое има моќен топ, е главен производ на американската армија за носење војници на боиштата од средината на 1980-тите. Американската армија има илјадници вакви возила кои би ѝ дале на Украина поголема огнена моќ на бојното поле и би ја зајакнале нејзината способност во рововски војни.
Сепак, ова значи дека САД нема да ги испрати тенковите „абрамс“ што ги бараше Украина.
Киев постојано бара од западните сојузници потешки борбени возила како што се американските тенкови „Абрамс“ и тенковите „Леопард“ од германско производство.