За време на разговорите за мировна формула, Турција ќе придонесе и „со својот авторитетен глас и став“, напиша Зеленски на социјалната мрежа Икс по телефонските консултации со Ердоган
Украина ги продолжува подготовките за мировен самит со цел да се стави крај на војната што Русија ја започна минатата година, изјави претседателот Володимир Зеленски по разговорите со својот турски колега Реџеп Таип Ердоган. Следниот чекор ќе биде уште еден состанок на советниците за национална безбедност од неколку сојузници на Украина, кој е планирано да се одржи на Малта на 28 и 29 октомври.
За време на разговорите за мировна формула, Турција ќе придонесе и „со својот авторитетен глас и став“, напиша Зеленски на социјалната мрежа Икс по телефонските консултации со Ердоган. Зеленски го окарактеризира ова решение, кое предвидува повлекување на руската армија од Украина, како единствена остварлива иницијатива за ставање крај на војната. Мировните иницијативи на многу други земји, вклучувајќи ги Кина и Бразил, беа широко отфрлени од Украина.
Во август претставници на околу 40 земји учествуваа на голем состанок за мировно решение за Украина во Саудиска Арабија. Русија тогаш не беше поканета. Украина планира да организира мировен самит до крајот на годината. Зеленски му се заблагодари на Ердоган за неговата цврста поддршка во борбата за украинскиот суверенитет и територијален интегритет. Тој не откри детали од средбата планирана во Малта.
Сепак, според претходните изјави од Киев, настанот ќе се однесува и на западните безбедносни гаранции против идната руска агресија.